Թուրքիայի եւ Քրդստանի աշխատավորական կուսակցության միջեւ հաշտությունը խախտվել է, եւ սկսվում է հակամարտության նոր փուլ։ Այս մասին հուլիսի 29-ին կայացած մամուլի ասուլիսի ժամանակ հայտարարեց թուրքագետ Գեւորգ Պետրոսյանը։ Նրա խոսքով՝ ներկայումս Թուրքիայի համար բավական բարդ եւ քաոսային վիճակ է ստեղծվել։
«Դեռեւս պարզ չէ կոալիցիայի ձեւավորման հարցը, որի պատճառով կարող են նոր ընտրություններ կայանալ, իսկ դա արդեն իսկ նոր խնդիր է առաջացնում, եթե հաշվի ենք առնում քրդերի հետ կապված բարդ իրավիճակը, քանի որ իշխող կուսակցությունը նոր ընտրություններում առաջին հերթին նպատակ կդնի տապալել քրդական կուսակցությունը, իսկ դա հղի է լուրջ բախումների վտանգով»,- ընդգծեց Պետրոսյանը։
Թուրքագետը հավելեց, որ 2 տարի շարունակվող պայմանական հաշտությունից հետո Թուրքիայի եւ ՔԱԿ-ի միջեւ արյունալի բախումներ են սկսվել։ «Այսինքն՝ դա նշանակում է, որ թուրք-քրդական հաշտության Էրդողանի պլանները ձախողվում են, քանի որ երկամյա դադարից հետո երկու կողմերն էլ զոհեր ունեն։
Թուրքական իշխանություններին նոր քաղաքականություն եւ նոր ջանքեր են պետք՝ խաղաղությունը վերականգնելու համար։ Շատ բարդ է ասել, թե որքանով դա կհաջողվի Էրդողանին, քանի որ նրա առջեւ դրված է կոալիցիոն կառավարություն ձեւավորելու հարցը»,- ասաց Գեւորգ Պետրոսյանը։
