Հուլիսի 29-ին ՀՀ էկոնոմիկայի նախարար Կարեն Ճշմարիտյանն ընդունել է Իրաքյան Քուրդիստանի տարածքային կառավարության պլանավորման նախարար Ալի Սինդին:
Հանդիպմանը մասնակցել են նաեւ Հայաստանի Հանրապետությունում Իրաքի Հանրապետության արտակարգ եւ լիազոր դեսպան Ղազի Տահիր Խալեդը, Իրաքի Հանրապետությունում Հայաստանի Հանրապետության արտակարգ եւ լիազոր դեսպան Կարեն Գրիգորյանը, ՀՀ էկոնոմիկայի նախարարի տեղակալ Սերգեյ Ավետիսյանը, ինչպես նաեւ նախարարության այլ աշխատակիցներ եւ ԱԳՆ ներկայացուցիչ:
Նախարար Ճշմարիտյանը, ողջունելով հյուրերին` նշել է երկկողմ տնտեսական համագործակցության զարգացման անհրաժեշտությունը, հատկապես` գործարար շրջանակների միջեւ կապերի հաստատումն ու զարգացումը:
Իրաքյան Քուրդիստանի տարածքային կառավարության պլանավորման նախարար Ալի Սինդին, շնորհակալություն հայտնելով ջերմ ընդունելության համար, նույնպես կարեւորել է երկու երկրների գործարար համայնքների ներկայացուցիչների միջեւ կապերի հաստատումն ու ամրապնդումը: Նախարար Ալի Սինդին ավելացրել է, որ այս այցը լայն հնարավորություն է ընձեռում` ծանոթանալու երկուստեք հետաքրքրություն ներկայացնող ոլորտներում համագործակցության առկա հնարավորություններին:
Հանդիպման ընթացքում Կարեն Ճշմարիտյանը համառոտ ներկայացրել է ՀՀ տնտեսությունը, Հայաստանում տնտեսական գործունեություն ծավալելու առանձնահատկություններն ու առավելությունները, արտաքին առեւտրի բարենպաստ պայմանները, այնուհետեւ խոսել է Հայաստանի Հանրապետությունում գործող ազատ տնտեսական գոտիներում արտադրություն կազմակերպելու հնարավորությունների մասին: Հաշվի առնելով Հայաստանի փորձը ջերմոցային տնտեսությունների, թեթեւ արդյունաբերության, դեղագործության, ջրերի եւ ծխախոտի արտադրության ոլորտներում` նախարարն առաջարկել է քննարկել համագործակցության հնարավորությունները նշված ոլորտներում:
ՀՀ էկոնոմիկայի նախարարն առաջարկել է նաեւ հայ-իրաքյան միջկառավարական հերթական համատեղ նիստի շրջանակներում կազմակերպել գործարար համաժողով:
Հանդիպման ավարտին Իրաքյան Քուրդիստանի տարածքային կառավարության պլանավորման նախարար Ալի Սինդին Հայաստանի Հանրապետության էկոնոմիկայի նախարար Կարեն Ճշմարիտյանին հրավիրել է Էրբիլ: