«Շենգավիթ» բժշկական կենտրոնից հուլիսի 27-ին «Էրեբունի» ԲԿ տեղափոխված եւ երկու օր անց մահացած 26-ամյա Մերի Մարգարյանի նորածին դստեր վիճակը շարունակում է ծայրահեղ ծանր մնալ: Այս մասին NEWS.am-ի թղթակցին հայտնեցին «Էրեբունի» բժշկական կենտրոնից:
Նրանց փոխանցմամբ՝ աղջնակը ծնվել է 2 կգ քաշով:
NEWS.am-ի տեղեկություններով՝ Մերի Մարգարյանը «Շենգավիթ» ԲԿ է տեղափոխվել հուլիսի 26-ի երեկոյան բարձր ջերմությամբ: Մինչեւ այդ էլ ծննդկանը մի քանի օր գնացել է ստուգման հիվանդանոց, սակայն որեւէ խնդիր նրա մոտ չի արձանագրվել. բուժող բժշկուհին ջերմիջեցնող է նշանակել եւ տուն ուղարկել: Միայն հուլիսի 26-ի երեկոյան են նրան ընդունել հիվանդանոց, մեկ օր անց նրա վիճակը վատացել է եւ ծայրահեղ ծանր վիճակում տեղափոխվել է «Էրեբունի» բժշկական կենտրոն, որտեղ կեսարյան հատում են արել: Վիրահատությունից երկու օր անց Մերի Մարգարյանը մահացել է:
Առողջապահության նախարարությունից էլ NEWS.am-ի թղթակցին հայտնեցին, որ Մերի Մարգարյանի մահվան պատճառը կպարզի դատաբժշկական փորձաքննությունը:
Նշենք, որ «Շենգավիթ» ԲԿ-ից կատարվածի վերաբերյալ հրաժարվեցին որեւէ մեկնաբանություն տալ:
Ավելի վաղ հայտնել էինք, որ Երեւանի «Էրեբունի» բժշկական կենտրոնում 2015թ. հուլիսի 29-ին 26-ամյա ծննդկան է մահացել, որին երկու օր առաջ տեղափոխել էին «Շենգավիթ» բժշկական կենտրոնից: Հիվանդանոցից փոխանցել են, որ ծննդկանին՝ Մերի Մարգարյանին, կեսարյան հատում են արել, վիճակը ծայրահեղ ծանր է եղել, 2 օր անց նա մահացել է: Փոքրիկի կյանքը հաջողվել է փրկել, սակայն վիճակը ծանր է: