Հաքերները կոտրել են աշխարհում երկրորդ ամենամեծ ավիաընկերության՝ United Airlines-ի տվյալների բազան, հաղորդում է BloombergBusiness-ը։ Կոտրելու հետքերը հայտնաբերվել էին մայիսին կամ հունիսի սկզբին, սակայն դրա մասին տեղեկությունը զանգվածային լրատվամիջոցներում հայտնվել է միայն այժմ։
BloombergBusiness-ի հաղորդմամբ՝ հնարավոր է` հաքերների տրամադրության տակ են հայտնվել միլիոնավոր ամերիկացիների տեղաշարժի վերաբերյալ տեղեկությունները, իսկ ավիաընկերությունը հայտնվել է կոտրված համակարգերով` ԱՄՆ ռազմավարական կարեւորության ընկերությունների եւ պետական հաստատությունների ցանկում։
Համակարգչային անվտանգության FireEye ամերիկյան ընկերությունը կատարվածը կապում է չինացիների աջակցությամբ գործող հաքերների խմբի հետ։ Ըստ BloombergBusiness-ի՝ հաքերները ներթափանցել են առնվազն 10 ընկերության եւ կազմակերպության համակարգիչներ։
Փորձագետների կարծիքով՝ ակնհայտ է, որ չինական հետախուզությունը տվյալների լայն բազա է հավաքում, եւ հաքերների խմբի գողացած համակարգչային ֆայլերը կարող են հնարավորություն տալ պարզելու պաշտպանության եւ հետախուզության ոլորտում աշխատող ամերիկացիների, այդ թվում պայմանագրերով աշխատողների ինքնությունը։