Ռումինիայի իշխանությունները առգրավել են Արեւելյան Եվրոպայի պատմության մեջ հերոինի ամենամեծ խմբաքանակը (333 կգ), հաղորդում է «Սինհուա» գործակալությունը՝ վկայակոչելով Ռումինիայի կազմակերպված հանցավորության եւ ահաբեկչության դեմ պայքարի վարչությանը (DIICOT):
DIICOT-ի ներկայացուցիչ Դանիել Խորոդնիչեանուի խոսքով, մաքսային ծառայությունները հերոինի խմբաքանակն առգրավել են Հունգարիայից Ռումինիա անցկացնելու փորձի ժամանակ:
Տեղի իշխանությունների ներկայացուցիչները առգրավված խմբաքանակը խոշորագույն են համարել Արեւելյան Եվրոպայի պատմության մեջ: Մինչ այժմ ամենախոշորը համարվել է 256 կգ-ն, որն առգրավվել է 2005 թվականին, հաղորդում է «ՌԻԱ Նովոստին»:
Ռումինիայի իշխանությունները ենթադրում են, որ թմրանյութերը Ռումինիա են հասել Աֆղանստանից՝ Ադրբեջանի, Վրաստանի, Հայաստանի եւ Ուկրաինայի միջոցով, իսկ հետո այն պետք է հասներ նաեւ Արեւմտյան Եվրոպա:
