Արդեն երեք օր Հանրապետության հրապարակում էլեկտրաէներգիայի թանկացման դեմ` «Ոտքի Հայաստան» նախաձեռնության բողոքի շուրջօրյա ակցիայի մասնակիցների թիվը գնալով ավելանում է, բայց դեռեւս բավարար ակտիվություն քաղաքացիները չեն դրսեւորում։ Այս մասին NEWS.am–ին ասաց նախաձեռնության խորհրդի անդամ Դավիթ Սանասարյանը` դա բացատրելով արձակուրդների սեզոնով։
«Քաղաքացիները երևի հանգստի ռեժիմի մեջ են, դրա համար էլ այժմ ռեժիմը խուճապի մեջ չի: Քաղաքացիները կարող են հանգստանալ, դա իրենց իրավունքն է, բայց պետք է մի բան հիշեն, որ իրենցից շատերը խոսք են արտաբերել՝ «պետք է պայքարեն մինչև վերջ»: Բայց, եթե այս տեմպով շարունակվի, սակագինը կբարձրանա օգոստոսի 1-ից»,-ասաց նա:
Հանրապետության հրապարակում քաղաքացիական անհնազանդության գործողությունները Սանասարյանը համարում է արդյունավետ և հաջողված: Նրա խոսքով՝ «Ոտքի Հայաստան» նախաձեռնությունն այս պահին ավելի շատ պայքարում է ոստիկանությանն օրինական դաշտ տեղափոխելու համար:
«Ճիշտ է` մեր գերխնդիրը էլեկտրաէներգիայի սակագնի բարձրացման որոշման չեղարկումն է, բայց այս պահին պայքարում ենք, որ ոստիկանությանը տեղափոխենք օրինական դաշտ: Մեր տված հարկերով աշխատող այստեղ այսքան ոստիկան չպետք է իրենց ուժերը վատնեն՝ անօրինական հրամաններ կատարելով»,-նշեց նա:
Դավիթ Սանասարյանը նաև նշեց, որ այսօր՝ հուլիսի 29-ին, «Ոտքի Հայաստան» նախաձեռնությունը կրկին Հանրապետության հրապարակում անելու է քաղաքացիական անհնազանդության ակցիաներ, եւ շարունակելու է այնքան, մինչև ոստիկանությունը թույլ տա իրենց նստացույց անել Հանրապետության հրապարակի կենտրոնում։
Նշենք, որ «Ոտքի Հայաստան» շարժումը հայտարարել է, որ հուլիսի 27-ից 72-ժամյա նստացույց է սկսում։ Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։ Էլեկտրաէներգիայի թանկացման դեմ բողոքի առաջին ալիքը նախաձեռնած եւ օրեր շարունակ նույն պահանջով Բաղրամյան պողոտան փակած «Ոչ թալանին» նախաձեռնությունը մերժել է նստացույցին միանալու առաջարկը։
