Կոտայքի մարզի Զառ եւ Սրաբերդ գյուղերի մոտակայքում այսօր՝ հուլիսի 29-ին, «ԶԻԼ» մակնիշի ավտոմեքենա է վթարի ենթարկվել: Վարորդի 4-ամյա որդին մահացել է: Այս մասին NEWS.am-ի թղթակցի հետ զրույցում ասաց Ակունք համայնքի ղեկավար Հունան Ռուբինյանը: Մահացած երեխան նրա համագյուղացին է:
«Վարորդը, նրա որդին եւ Զառ գյուղի եւս երկու բնակիչներ՝ հայր եւ որդի, վերադառնում էին Սրաբերդ գյուղից, երբ տեղի է ունեցել դեպքը: Ըստ նախնական վարկածի, վթարի պատճառն արգելակների անսարքությունն է եղել: Չորսն էլ իրենց դուրս են գցել մեքենայից: Դժբախտաբար երեխան մահացել է, մյուս 3-ը մարմնական վնասվածքներ են ստացել»,- ասաց գյուղապետը:
Նրա խոսքով՝ Զառ գյուղի բնակիչները Երեւան են տեղափոխվել, նրանց վիճակը կայուն է, իսկ մեքենայի վարորդն առաջին բուժօգնություն է ստացել եւ վերադարձել գյուղ:
Նշենք, որ մահացած երեխան ընտանիքի միակ զավակն էր:
