Էլեկտրաէներգիայի սակագնի թանկացման որոշումը չեղարկելու պահանջով Երեւանի Հանրապետության հրապարակում նստացույց անող «Ոտքի՛, Հայաստան» շարժման խորհուրդը քիչ առաջ հրապարակում հանդես եկավ հայտարարությամբ: Այն ներկայացնում ենք ամբողջությամբ:
«ՀՀ ոստիկանությունը շարունակում է խոչընդոտել էլեկտրաէներգիայի սակագնի բարձրացման դեմ Հանրապետության հրապարակի կենտրոնում նստացույցի անցկացմանը: Ոստիկանությունը կենդանի պատնեշ ստեղծելով՝ փորձում է ֆիզիկապես արգելել «Հավաքների ազատության» մասին օրենքի 24-րդ հոդվածի համաձայն նախաձեռնված խաղաղ հավաքը:
Ոստիկանության ապօրինի գործողության ժամանակ հերթական անգամ անհամաչափ ուժ կիրառելու արդյունքում քաղաքացիական շարժման խորհրդի անդամ Դավիթ Սանասարյանը ստացավ մեջքի վնասվածքներ եւ շտապօգնության մեքենայով տեղափոխվեց «Էրեբունի» բժշկական կենտրոն:
«Ոտքի՛, Հայաստան» շարժման խորհուրդը դատապարտում է Ոստիկանության անօրինական գործողությունները եւ պատկան մարմինների անգործությունը, որի հետեւանքով ոտնահարված է քաղաքացիների խաղաղ հավաքներ անցկացնելու սահմանադրական իրավունքը եւ նրանց առողջությանը պատճառվում է վնաս:
Եվս մեկ անգամ հորդորում ենք ոստիկանությանը՝ փորձել օրենքին համաձայն, վերացնել Հանրապետության հրապարակի կենտրոնն արգելափակող պատնեշը եւ ցուցաբերել օրենքով սահմանված աջակցություն խաղաղ նստացույցի անցկացմանը»: