Մեքսիկայում բեռնատարը բախվել է ուխտավորների թափորին, որի հետեւանքով մահացել է առնվազն 20, վիրավորվել՝ 30 մարդ:
Մասապիլի քաղաքապետ Վիսենտե Պերես Էսկիվելի խոսքով, բեռնատարի արգելակները չեն գործել, եւ այն մխրճվել է Մասապիլի փողոցներից մեկով անցնող ուխտավորների թափորի մեջ:
Վթարից հետո վարորդը փախել է դեպքի վայրից, ներկայումս նրան որոնում են, հաղորդում է BBC-ի ռուսական ծառայությունը:
Դեպքի վայր են ժամանել բազմաթիվ փրկարարներ, այդ թվում հարեւան Կոաուիլա նահանգից: Վիրավորներին արագ տեղափոխում են հիվանդանոցներ:
Նշենք, որ հուլիսի կեսերին Հնդկաստանում մի քանի տասնյակ ուխտավորներ էին մահացել հրմշտոցի հետեւանքով: