ԱՄՆ իշխանությունները իրենց մտահոգությունն են հայտնել պաղեստինյան օկուպացված տարածքներում հրեաների համար մոտ 300 նոր տուն կառուցելու՝ Իսրայելի կառավարության որոշման կապակցությամբ։

ԱՄՆ պետդեպարտամենտի հայտարարության մեջ ասված է, որ Վաշինգթոնն առաջվա պես այս շինությունները համարում է ապօրինի ու վճռականորեն դեմ է Հորդանանի արեւմտյան ափին ու Արեւելյան Երուսաղեմում դրանց շինարարությունը շարունակելուն։

Ամերիկյան գերատեսչությունում համարում են, որ այս տարածքներում հրեական բնակավայրերի ընդլայնումը կխոչընդոտի բանակցությունների միջոցով իսրայելապաղեստինյան հակամարտության կարգավորմանը, հայտնում է BBC-ի ռուսական ծառայությունը։

Ավելի վաղ՝ չորեքշաբթի, Իսրայելի վարչապետ Բենյամին Նեթանյահուն հայտարարել էր, որ երկրի կառավարությունը որոշել է 300  տուն կառուցել Հորդանան գետի Արեւմտյան ափին՝ Բեյթ ԷԼյ հրեական բնակավայրում։

Ավելի վաղ այս տարածքում հրեական իշխանությունները դատարանի որոշումով ապամոնտաժել էին երկու բնակելի տուն, որոնք, ինչպես հայտում էին , ապօրինի են եղել կառուցված պաղեստինցիներին պատկանող տարածքներում։

Պաղեստինի իշխանությունները ավանդաբար դեմ են արտահայտվում նման շինարարությանը՝  անվանելով այն ապօրինի ու խաղաղ կարգավորման գործընթացին խոչընդոտող։