2015թ. 1-ին կիսամյակում բջջային հեռախոսների արտադրության ֆիննական Nokia կորպորացիայի զուտ շահույթը նախորդ տարվա նույն ժամանակահատվածի համեմատ 4,3 անգամ նվազել է՝ կազմելով 526 մլն եվրո։ 2014թ. 1-ին կիսամյակում ընկերության շահույթը կազմել էր 2,282 մլրդ դոլար։ 2015թ. երկրորդ եռամսյակում շահույթը նվազել էր 86,1%-ով՝ կազմելով 348 մլն դոլար, հաղորդում է Bloomberg-ը։

Չնայած շահույթի նվազմանը՝ այս տարվա առաջին կիսամյակում Nokia-ի հասույթը ավելացել է 14,2 տոկոսով՝ կազմելով մինչև 6,4 մլրդ եվրո։ Ընթացիկ տարվա երկրորդ եռամսյակում ընկերության հասույթը ավելացել էր 9,1%-ով՝ հասնելով 3,2 մլրդ եվրոյի՝ անցած տարվա նույն ժամանակահատվածի 2,9 մլրդ-ի համեմատ։

Nokia-ի ղեկավարությունը գոհ է տարվա առաջին կեսին արաձանագրված ֆինանսական ցուցանիշներից։ Ընկերության գործադիր տնօրեն Ռաջեւ Սուրիի խոսքով՝ ծախքերի կրճատումը ցանկալի արդյունքներ կապահովի։

Nokia-ն բջջային հեռախոսների արտադրության բաժինը 5,4 մլրդ եվրոյով ամերիկյան Microsoft-ին էր վաճառել 2014-ի գարնանը։