Ողջ աշխարհը գիտի, որ Թուրքիան անմիջական կապ ունի «Իսլամական պետության» հետ. ԻՊ-ից Թուրքիա մեկ բարելը 10 դոլարով նավթ է տրամադրվում եւ ռազմական ճակատներ համապատասխան արդյունաբերական մատակարարումներ են իրականացվում։ Այս մասին հուլիսի 30-ին կայացած մամուլի ասուլիսի ժամանակ հայտարարեց ԵՊՀ պրոֆեսոր, աստվածաբան Վարդան Խաչատրյանը։
Նրա համոզմամբ՝ ԻՊ-ից եկող առաջին լուրջ սպառնալիքը ընդհանուր խալիֆայության ձեւավորման գաղափարն է։ «Այդ խալիֆայության հիմնական զանգվածները արաբալեզու եւ թուրքալեզու իսլամի կրողներն են։ Թուրքալեզու իսլամի հիմնական կրողը այսօր Թուրքիան է։ Թուրքալեզու իսլամի միասնությանը ամբողջ աշխարհում միշտ խանգարել եւ խանգարում են հայերն ու Հայաստանի Հանրապետությունը։ Պատահական չէ, որ սեպտեմբերի 21-ին իսլամիստ արմատականները պայթեցրեցին Դեր Զորի հայկական եկեղեցին։
Հիմա Թուրքիան ինտենսիվ ռազմական գործողություններ է իրականացնում ԻՊ-ի եւ ինչպես իրենք են ձեւակերպում քուրդ անջատողականների դեմ։ Ամերիկացի փորձագետները նշում են, որ սա ԻՊ-ի նկատմամբ «սանրվածքի փոփոխություն է» եւ «հարձակում» քրդական զանգվածների դեմ»,- ասաց Խաչատրյանը։