Իջեւանի քաղաքային կոմունալ ծառայության հիմնարկի տնօրեն Սուրեն Չիբուխչյանի հայրը՝ Սամվել Չիբուխչյանը մեղադրվում է հիշյալ հիմնարկից խոշոր չափերի գումար հափշտակելու մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Սամվել Չիբուխչյանն Արթուր Ասրյանի կողմից աշխատանքի չգալու թույլտվություն տալու միջոցով հափշտակել է վերջինիս 12 ամսվա աշխատավարձի գումարը` ընկերությանը պատճառելով զգալի չափի՝ 480000 ՀՀ դրամի գույքային վնաս:
Սամվել Չիբուխչյանին այս հարցում օժանդակել է ընկերության ինժեներ Համլետ Բլբուլյանը:
Սուրեն Չիբուխչյանին մեղադրանք է առաջադրվել Քրեական օրենսգրքի 178-րդ հոդվածի 1-ին, իսկ Համլետ Բլբուլյանին՝ 38-178-րդ հոդվածի 1-ին մասի հատկանիշներով: Խափանման միջոց է ընտրվել ստորագրություն չհեռանալու մասին:
Գործը քննվում է Տավուշի մարզի ընդհանուր իրավասության դատարանում:
Հիշեցնենք, որ ավելի վաղ մամուլում հրապարակումներ են եղել այն մասին, որ Իջեւանի կոմունալ ծառայության տնօրենը գումարներ է յուրացրել:
