«Օֆշորի» գործով դատական նիստին այսօր՝ հուլիսի 30-ին, Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում բանավեճ ծավալվեց տուժող Փայլակ Հայրապետյանի եւ ամբաստանյալ Աշոտ Սուքիասյանի միջեւ։
Աշոտ Սուքիասյանը հայտարարեց, որ Փայլակ Հայրապետյանը ժամանակին պահանջել է իր անունով ձեւակերպել Սիերա Լեոնեի՝ իր ամբողջ ունեցվածքը` սպառնալով, որ այլապես խնդիրներ կառաջացնի ամբաստանյալի համար:
«Գործում ռուսերենով մի փաստաթուղթ կա, որով պահանջում եք Աֆրիկայում ունեցած հանքերս Ձեր անունով ձեւակերպեմ, եթե չձեւակերպեմ, պրոբլեմներ կունենամ, իսկ եթե ձեւակերպեմ, իմ դեմ քրեական գործ չեք հարուցի»,- Փայլակ Հայրապետյանին դիմելով ասաց Աշոտ Սուքիասյանը, ինչին ի պատասխան՝ տուժողն ասաց. «Ես ուզում էի մեկը մյուսով փոխարինեինք, բայց դու այնտեղ ի՞նչ ունեիր, որ իմ անունով ձեւակերպեիր: Հիմա ինձնից գողացել ես ունեցվածքս, քրեական գործ եմ հարուցել»:
Փայլակ Հայրապետյանի պատասխանին Աշոտ Սուքիասյանը քմծիծաղով արձագանքեց։
«Հենց դատավարությունը ավարտվի, ֆիլմ եմ նկարելու, միայն չգիտեմ՝ Հայրապետյանի դերն ով կարող է խաղալ»,- կատակեց Սուքիասյանը, ինչից հետո նախագահող դատավորը նրան զգուշացրեց կոռեկտ լինել իր արտահայտություններում եւ չվիրավորել դատավարության մասնակիցներին:
Աշոտ Սուքիասյանը նաեւ հետաքրքրվեց, թե ինչու էր Փայլակ Հայրապետյանը ադամանդի հանքարդյունաբերության գործարքի ամբողջ ընթացքում հրաժարվում փաստաբանների կողմից կազմված պայմանագրերից։
«Ինչու՞ չէիք ստորագրում իմ եւ նույնիսկ Ձեր փաստաբանների կողմից կազմված պայմանագրերը: Գուց դա հատուկ էիք անում, որ հետագայում ինձ մեղադրե՞ք խարդախության մեջ», - ասաց Սուքիասյանը:
Փայլակ Հայրապետյանը պարզաբանեց, որ այդ պայմանագրերը շատ ուշ են իրեն առաջարկել ստորագրել:
«Այո, առաջարկել եք պայմանագիր ստորագրել, բայց երբ արդեն ինձ բերել էիք կործանման եզրին: Վարկերն արդեն ստացել էիք: Դրա նպատակ այն էր, որ այսօր ասեիք՝ ես էդ վարկերի հետ գործ չունեմ»,-ասաց Հայրապետյանը:
Դատական նիստը հետաձգվեց, քանի որ մեղադրողը շտապում էր մեկ այլ նիստի: Հաջորդ դատական նիստին կհարցաքննվեն գործով մյուս տուժողները:
Հիշեցնենք, որ «Օֆշորի գործով» տուժող ճանաչված, ունեզրկված գործարար Փայլակ Հայրապետյանը պնդում է, որ իրեն պատկանող մոտ 100 միլիոն ԱՄՆ դոլարի անշարժ գույքը 2009թ. գրավ է դրել «Ամերիաբանկում», որն այն գնահատել է 33 միլիոն դոլար եւ դրա դիմաց գործարար Աշոտ Սուքիասյանին հատկացրել 10.7 միլիոն դոլար: Վերջինը, պայմանավորվածության համաձայն, այդ գումարը Աֆրիկայում ոսկու և ալմաստի արդյունահանման մեջ ներդնելու փոխարեն, փոխանցել է կիպրոսյան օֆշորային մի քանի ընկերությունների, այդ թվում՝ Wlispera Holdings Limited-ին, իսկ Փայլակ Հայրապետյանը զրկվել է ունեցվածքից:
Կիպրոսի ռեգիստրի պաշտոնական կայքում Wlispera Holdings Limited-ի բաժնետեր նշվում էին Աշոտ Սուքիասյանը, նախկին վարչապետ Տիգրան Սարգսյանը և Սամվել Կճոյանը: Սակայն 2014թ. հունվարին Թբիլիսում ձերբակալված եւ հինգ ամիս անց հայաստանյան իրավապահներին արտահանձնված Սուքիասյանը, պնդում է, որ Տիգրան Սարգսյանը և արքեպիսկոպոս Կճոյանը որևէ կապ չունեն օֆշորային այդ ընկերության հետ, և որ նրանց ստորագրություններն անձամբ ինքն է կեղծել:
Գործով միակ մեղադրյալն այս պահին գործարար Աշոտ Սուքիասյանն է։ Նրան մեղադրանք է առաջադրվել ՀՀ ՔՕ 190-րդ հոդվածի 3-րդ մասի 1-ին կետով, 178-րդ հոդվածի 1-ին կետով, 205-րդ հոդվածի 2-րդ մասով այն բանի համար, որ նա խարդախությամբ ուրիշի առանձնապես խոշոր չափերով գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված առանձնապես խոշոր չափերով եկամուտներ, ինչպես նաեւ չարամտորեն խուսափել է առանձնապես խոշոր չափերով հարկեր, տուրքեր եւ պարտադիր այլ վճարումներ կատարելուց:
Ներկայում ԱՄՆ-ում Հայաստանի դեսպան Տիգրան Սարգսյանը և Արարատյան Հայրապետական թեմի առաջնորդական փոխանորդ Տեր Նավասարդ արքեպիսկոպոս Կճոյանը հերքում են իրենց առնչությունները օֆշորային գործին: Միաժամանակ, Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում քննվում է Տիգրան Սարգսյանի քաղաքացիական հայցն ընդդեմ Փայլակ Հայրապետյանի, որով նախկին վարչապետը պահանջում է հերքել լրատվամիջոցներում իր հասցեին հնչեցրած մեղադրանքները, որոնք նա համարում է զրպարտություն, և հասցված բարոյական վնասի դիմաց 1 միլիոն ՀՀ դրամ փոխհատուցել:
