Վերլուծաբան Արգիշտի Կիվիրյանի դեմ հարուցված քրեական գործով առաջին ատյանի դատարանի որոշումը նրա փաստաբանը բողոքարկել է Վերաքննիչ դատարանում: Այսօր՝ հուլիսի 30-ին, ՀՀ Վերաքննիչ քրեական դատարանում տեղի ունեցավ առաջին դատական նիստը, որի ընթացքում պաշտպանական կողմը ներկայացրեց իր բողոքը, իսկ մեղադրողը պատասխանեց բողոքին:
Դատական նիստն այսօր հետաձգվեց: Հաջորդ դատական նիստը նշանակվեց օգոստոսի 10-ին:
Նշենք, որ Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը հունիսի 8-ին վերլուծաբան Արգիշտի Կիվիրյանին մեղավոր ճանաչեց եւ տուգանեց նվազագույն աշխատավարձի 400-ապատիկի չափով՝ 400 հազար դրամով: Դատարանը, սակայն, Կիվիրյանի դեմ հարուցված քրեական գործով դատավճիռը համաներումով չկիրառեց:
Հիշեցնենք, որ նախորդ տարվա օգոստոսի 24-ին Կոմիտաս 5 հասցեում կառուցվող բազմահարկի դեմ հարակից շենքի բնակիչների բողոքի միացած Կիվիրյանը հանցագործության մասին հաղորդում էր տվել, որ բողոքի ակցիայի ժամանակ ոստիկաններն իրեն բաժին տանելիս բռնություն են գործադրել իր նկատմամբ: Սակայն քրգործ հարուցվել էր ոչ թե այդ առթիվ, այլ ոստիկանի հաղորդման հիման վրա, ըստ որի, Արգիշտի Կիվիրյանն է հարվածներ հասցրել ոստիկանին եւ ինքնավնասվել՝ գլուխը հարվածելով ոստիկանական ավտոմեքենայի դռանը: Կիվիրյանի դեմ քրեական գործ է հարուցվել Քրեական օրենսգրքի 316 հոդվածի 1-ին մասով` իշխանության ներկայացուցչի նկատմամբ առողջության համար ոչ վտանգավոր բռնություն գործադրելը: