Նորզելանդացի հորը, որն ավելի քան կես միլիոն դոլար է հավաքել Դաունի սինդրոմով ծնված որդու՝ Լեոյի համար, մեղադրում են հարձակման մեջ:
Սեմյուել Ֆորեսթը, որը վերջերս Հայաստանից կնոջ հետ փոխադրվել է Նոր Զելանդիա, հուլիսի 30-ին ներկայացել է դատարան, քանի որ նրա դեմ կնոջ վրա հարձակվելու մեղադրանք է առաջադրվել: Տղամարդը, սակայն, ըստ նորզելանդական stuff.co.nz կայքի, հերքում է բոլոր մեղադրանքները եւ կրկին դատարանի առջեւ կկանգնի սեպտեմբերին:
Հարձակման զոհը Տրինա Մաքլեչլենն է՝ հիմնադրամի նախկին հոգաբարձուն, որը Ֆորեսթը ստեղծել էր որդու անունով եւ փոխանցել հավաքված 600 հազար դոլարը: Ավելի վաղ Տրինան նրան մեղադրել էր հիմնադրամից գումար վերցնելու մեջ:
Դատարանում արված հայտարարության համաձայն, բարկանալով՝ Ֆորեսթը սեղանը շրջել է կնոջ վրա, այնուհետեւ հարվածել գլխին: Մաքլեչլենի հավաստմամբ, հարվածի արդյունքում խոսքի հետ կապված խնդիրներ ունի:
Ավելի վաղ NEWS.am-ը հաղորդել էր, որ Նոր Զելանդիայի քաղաքացի Սեմյուել Ֆորեսթը եւ Ռուզան Բադալյանը՝ Դաունի սինդրոմով ծնված փոքրիկ Լեոյի ծնողները, հաշտվել են եւ փոխադրվել Նոր Զելանդիա:
Հիշեցնենք, որ Լեոն ծնվել է հունվարի 21-ին, Երեւանում: Նրա մոտ Դաունի սինդրոմ են ախտորոշել: Առաջինն այդ մասին հայտնել է երեխայի հայրը՝ միջազգային լրատվամիջոցներին հայտարարելով, որ կինը որոշել է հրաժարվել երեխայից, իսկ ինքը՝ ոչ: Դա էլ նրանց բաժանման պատճառ էր դարձել: Ավելի ուշ Ռուզան Բադալյանը Facebook-ի իր էջում գրել էր, որ դա արել է հանուն երեխայի ապագայի: Ըստ նրա, Նոր Զելանդիայում Լեոն կունենա այն, ինչ Հայաստանում նրան երբեք չեն տա: