Հուլիսի 22-ից 24-ը ՌԴ ԱԳՆ, ՌԴ Վիեննայի ՄԱԿ-ի կառույցներում մշտական ներկայացուցչության եւ Միջուկային Էներգիայի Պետական Բաժնետիրություն «Ռոսատոմ» ընկերության հրավերով ՌԴ Վոլգոդոնսկ քաղաքում գտնվող Ռոստովի ատոմակայան այցելեցին ԱԷՄԳ-ում հավատարմագրված մշտական ներկայացուցիչները:
Պատվիրակության կազմում էին ՀՀ մշտական ներկայացուցիչ դեսպան Արման Կիրակոսյանը եւ մի շարք երկրների դեսպաններ, ԱԷՄԳ Միջուկային Էներգիայի հարցերով Գլխավոր տնօրենի տեղակալը, Ուրանի հարստացման միջազգային կենտրոնի գլխավոր տնօրենը, «Ռոսատոմ» ընկերության ղեկավարությունը, միջուկային էներգետիկայի հարցերով խորհրդատուներ եւ փորձագետներ:
Այցի շրջանակներում դեսպան Արման Կիրակոսյանն իր ռուսաստանյան գործընկերների հետ քննարկեց միջուկային էներգետիկայի ոլորտում ՀՀ-ՌԴ միջեւ համագործակցության առդի հարցերը, Մեծամորի եւ Ռոստովի ատոմակայանների միջեւ փոխգործակցության հեռանկարները:
Այցի ընթացքում պատվիրակությունն այցելեցին «Ատոմմաշ» ընկերության մասնաճյուղ, որտեղ արտադրվում են ԱԷԿ-ների, ջերմային կայանների եւ նավթագազաքիմիական կայանների սարքավորումներ: Տեղի ունեցած խորհրդակցության քննարկումների առարկան էր միջուկային էներգետիկայի բնագավառում միջազգային համագործակցությունը, ռուսական նախագծով ատոմակայանների շահագործման եւ սարքավորման փորձը, ինչպես նաեւ անվտանգության համակարգերը եւ ռուսական կայանների վերազինումը նոր սարքավորումներով, որոնք մշակվել եւ իրականացվել էին ԱԷՄԳ անվտանգության չափանիշներին համապատասխան:
Այցի շրջանակներում հյուրերը հանդիպեցին Վոլգոդոնսկի քաղաքապետին, քաղաքապետարանի շրջակա միջավայրի պահպանության վարչության պետին, ինչպես նաեւ այցելեցին Ռոստովի ԱԷԿ-ի փորձագետների վերապատրաստման կենտրոն: