Էլեկտրաէներգիան թանկացնելու որոշումը չեղարկել պահանջող «Ոտքի Հայաստան» նախաձեռնության իրազեկման երթն ավարտվեց: NEWS.am-ի հետ զրույցում «Ոտքի Հայաստան» նախաձեռնության անդամ Գեւորգ Եղիազարյանը նշեց, որ իրազեկման երթը դրական արդյունք տվեց, քանի որ երթին միացան նաեւ այլ քաղաքացիներ։
«Անշուշտ, իրազեկման ակցիան դրական արդյունք ունեցավ: Քիչ մարդկանցով գնացինք, շատով վերադարձանք: Մեզ միացան նաեւ Ռուսաստանի քաղաքացիներ»,-ասաց նա:
Նշենք, որ այժմ Հանրապետության հրապակում «Ոտքի Հայաստան» նախաձեռնության 2 տասնյակ ակտիվիստներ կան, իրավիճակը խաղաղ է, նրանք պատրաստվում են այսօր էլ գիշերել հրապարակում։ Ակտիվիստներին հսկում են մոտ 6 տասնյակ ոստիկաններ:
Հիշեցնենք, որ «Ոտքի՛, Հայաստան» նախաձեռնության հայտարարած 72 ժամը այսօր լրանում է, սակայն ակտիվիստները շարունակում են մնալ Հանրապետության հրապարակում, քանի դեռ չեն հասել իրենց նպատակին եւ նստացույց չեն արել հրապարակի կենտրոնում` «գորգին»։ Նրանք արդեն երեք գիշեր անցկացրել են Հանրապետության հրապարակում, նրանց շարունակում են հսկել մեծ թվով ոստիկաններ: «Ոտքի՛, Հայաստան» շարժումը պահանջում է չեղարկել էլեկտաէներգիան թանկացնելու ՀԾԿՀ որոշումը։