ԱՄՆ-ը Ռուսաստանի դեմ Ուկրաինայում տիրող իրավիճակի պատճառով պատժամիջոցային նոր փուլ է սկսել։ Նոր սահմանափակումների ցուցակում հայտնվել են 11 ֆիզիկական եւ 15 իրավաբանական անձ, որոնց թվում «Իժմաշ» եւ «Կալաշնիկով» ընկերությունները։ Բացի այդ պատժամիջոցների տակ են հայտնվել արդեն սահմանափակումների ցուցակում գտնվող «Ռոսնեֆտ» եւ «Վնեշէկոնոմբանկ» ընկերությունների հետ համագործակցող մի քանի կազմակերպություններ եւ ընկերություններ, գրում է «ՌԻԱ Նովոստի»-ն։
Ֆիզիկական անձանց ցուցակը համալրել են գործարար Ռոման Ռոտենբերգը, Ուկրաինայի նախկին նախագահի որդի Ալեքսանդր Յանուկովիչը, «Կալաշնիկով»-ի թոփ մենեջերները եւ մի շարք այլ անձինք։
ԱՄՆ Պետդեպն ու Ֆիննախն արդեն հայտարարել են, որ նոր պատժամիջոցները կիրառվում են նախկինները ամրապնդելու համար։ Դրանց չեղարկման մասին հնարավոր կլինի խոսել միայն այն ժամանակ, երբ կկատարվեն Դոնբասի հակամարտության կարգավորման մասին Մինսկի համաձայնագրերի պայմանները։