Անցյալ գիշեր մոտ 200 ներգաղթյալ փորձել են մտնել Լա Մանշի թունել, սակայն ֆրանսիացի ոստիկանները կանխել են ներգաղթի փորձը, մի քանի իրավախախտ ձերբակալվել են, գրում է AFP-ն։
Ինչպես նշում են փորձագետները, շաբաթվա վերջում ներգաղթյալների հոսքը պակասել է։ Անցյալ երկուշաբթի 2500 մարդ փորձել էր ճեղքել ոստիկանների սահմանապահ ջոկատը։ Օրերս Ֆրանսիայի ՆԳՆ-ն հանձնարարել էր ժանդարմների 2 լրացուցիչ ստորաբաժանում կարգել այնտեղ։
«Անվտանգության միջոցները զգալիորեն աճել են նոր ուժերի ժամանելուց հետո»,- հայտարարել է Լա Մանշի երկաթուղային թունելի օպերատոր ընկերության՝ «Եվրաթունելի» ղեկավարությունը, գրում է ՏԱՍՍ-ը։
Սակայն Ֆրանսիայի ՆԳՆ ներկայացուցիչները խոստովանում են, որ անգամ լրացուցիչ ուժեր կենտրոնացնելը իրավիճակը երկարաժամկետ հեռանկարով կարգավորելու տարբերակ չէ։ «Ամեն գիշեր մենք ստիպված ենք տասնյակ եւ հարյուրավոր ներգաղթյալներ բռնել»,- ասում են ոստիկանները։
Հիմնականում խոսքը Աֆրիկայի երկրների՝ Սոմալիի, Սուդանի, Եթովպիայի քաղաքացիների մասին է։