Պարագվայի մայրաքաղաք Ասունսիոնում ջրհեղեղի պատճառով ավելի քան 37 հազար մարդ է տարհանվել։ Այս մասին հինգշաբթի օրը հայտնել են տեղի իշխանությունները։
Տարերային աղետի պատճառ է դարձել Պարագվայ գետի վարարումը, որի ջրի մակարդակը հասել է 6․14 մետրի։ Ջրհեղեղից ամենից շատ տուժել է մայրաքաղաքի աղքատ թաղամասը, որտեղ մի քանի շաբաթ առաջ՝ հարավամերիկյան պետություն կատարած իր այցի ժամանակ այցելել էր Հռոմի պապ Ֆրանցիսկոսը, հայտնում է ՏԱՍՍ-ը։
Օդերեւութաբանների կանխատեսումներով՝ Պարագվայ գետում ջրի մակարդակը կսկսի իջնել մոտավորապես 25 օրից։ Գիտնականները Ասունսիոնում տեղի ունեցած ջրհեղեղը բացատրում են Էլյ Նինյո կլիմայական երեւույթի հետ։ Այս երեւույթն իրենից ներկայացնում է տաք հոսանք, որի հետեւանքով Խաղաղ օվկիանոսի արեւելյան մասում ջերմաստիճանը բարձրանում է 5-9 աստիճանով։
Վերջին ուժեղ Էլյ -Նինյոն արձանագրվել է 2009-2010թթ։ Այդ ֆենոմենը ազդում է քամիների ուղղության վրա, ինչից նվազում է Ատլանտիկայում փոթորիկների առաջացման հավանականությունը։ Դրա հետ մեկտեղ տվյալ կլիմայական երեւույթը, որպես կանոն, հանգեցնում է երաշտի՝ Հարավարեւելյան Ասիայում ու տեղատարափ անձրեւների՝ Հարավային Ամերիկայում, իսկ դրանից առաջացող ուժեղ քամիները կարող են խանգարել Մեքսիկյան նեղուցում նավթի ու գազի արդյունահանմանը։