Դերասանուհի Անի Երանյանի մասնակցությամբ հուլիսի 18-ին տեղի ունեցած վթարից տուժած Հայկ Մխիթարյանի հիշողությունը վերականգնվել է: Այս մասին NEWS.am-ի թղթակցին ասաց Էրեբունի» բժշկական կենտրոնի նյարդավիրաբուժական կլինիկայի գիտական ղեկավար Մամիկոն Եղունյանը:
«Հայկ Մխիթարյանն արդեն դուրս է գրվել հիվանդանոցից: Վիճակը շատ լավ է, վնասվածքները որեւէ հետեւանք չեն թողել»,- ասաց Մամիկոն Եղունյանը:
Նշենք, որ Հայկ Մխիթարյանը հիվանդանոց էր տեղափոխվել ծանր վիճակում: Մի քանի օր Հայկը գտնվում էր վերակենդանացման բաժանմունքում, նրան միացրել էին արհեստական շնչառության ապարատին:
Հիշեցնենք, որ դերասանուհի Անի Երանյանը 2015թ. հուլիսի 18-ին իր վարած «Հունդայի» մակնիշի մեքենայով վթարի է ենթարկվել Գեղարքունիքի մարզի Ճամբարակից դեպի Սեւանի մայրուղի տանող ճանապարհին: Դերասանուհին վնասվածքներով տեղափոխվել էր Սեւանի բժշկական կենտրոն: Հիվանդանոց էր տեղափոխվել նաեւ նրա մեքենայի ուղեւոր Հայկ Մխիթարյանը, Իզաբելա Դանիելյանը:
Ավտովթարի հետեւանքով տուժել էր նաեւ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատավոր Գագիկ Պողոսյանը, նրա կինը՝ Մարինե Կարապետյանը, նրանք եւս դիմել էին հիվանդանոց:
Հուլիսի 31-ին Քննչական կոմիտեն մերժել էր դեպքի առթիվ քրեական գործի հարուցումը բողոքի բացակայության պատճառաբանությամբ: