Մոսկվան եւ Անկարան շարունակում են «Թուրքական հոսք» նախագծի նախապատրաստական աշխատանքները, եւ բանակցությունները փակուղում չեն: Այսպիսի հայտարարություն է արել Ռուսաստանում Թուրքիայի դեսպան Ումիդ Յարդիմը «Ռիա Նովոստի» գործակալության հետ զրույցում:
«Չեմ կարծում՝ բանակցությունները փակուղում են, դրանք շարունակվում են»,- ասել է դեսպանը: Նրա խոսքով՝ այսօրվա դրությամբ հարցի շուրջ պաշտոնական բանակցությունները չեն մեկնարկել, սակայն նախապատրաստական աշխատանքի ուղղությամբ կան շփումներ, քանի որ «նախագիծը ծավալուն է, եւ տարբեր հարթություններում նախապատրաստական աշխատանքի անհհրաժեշտություն կա»: Ըստ դեսպանի՝ «ասել, որ ներկայում նախագծի իրականացումը ժամանակացույցից հետ է մնում ինչ-որ պատճառով, սխալ է»:
«Ամենակարեւորն այն է, որ աշխատանքը շարունակվում է: Օրինակ, համեմատության համար, «Կապույտ հոսք» նախագծի դեպքում որոշման ընդունումից մինչեւ իրականացում տեւել է հինգ տարի»,- ասել է Յարդիմը: «Թուրքական հոսք» նախագծով կառուցվելու է տարեկան 63 մլրդ խմ հզորությամբ գազամուղ, որով Ռուսաստանից Սեւ ծովով գազ է արտահանվելու Թուրքիա: