«Ժառանգություն» խմբակցության քարտուղար Թեւան Պողոսյանը կարծում է, որ քաղաքացիական հասարակությունը պետք է նաեւ քաղաքական օրակարգ թելադրի: Այս մասին նա նշել է այսօր՝ հուլիսի 31-ին, լրագրողների հետ հանդիպման ժամանակ:
«Քաղաքացիական հասարակությունը պետք է կարողանա քաղաքական օրակարգ պատվիրել։ 2008-ից հետո ունեցել ենք մի քանի դեպքեր՝ Մաշտոցի պուրակ, տրանսպորտի հարյուր դրամ եւ այլն, որ հաջողություն են ունեցել։ Ես ուրախ եմ, որ նոր սերունդը կարողանում է հարցեր բարձրացնել եւ այն ինչ եղավ հունիսին Բաղրամյանում, հաղթանակ էր, քանի որ կարողացան ստիպել պետական մարմիններին, որ աշխատեն, լուծումներ փնտրեն»,- նշել է Պողոսյանը:
Նրա խոսքով, էլեկտրաէներգիայի թանկացման դեմ պայքարը եւս քաղաքական էր, քանի որ երբ դու որպես կարգախոս ընտրում ես «Ոչ թալանին»-ը, դրանով ողջ համակարգի դեմ ես դուրս գալիս: