Թուրքիայի նախագահ Ռեջեփ Թայիփ Էրդողանը բոլոր հնարավոր միջոցներով ձգձգում է կոալիցիայի ձեւավորումը, քանի որ, եթե այն չձեւավորվի, այդ դեպքում պետք է արտահերթ խորհրդարանական ընտրություններ կայանան։ Այս մասին հուլիսի 31-ին կայացած մամուլի ասուլիսի ժամանակ հայտարարեց թուրքագետ Հակոբ Չաքրյանը։
Նա հիշեցրեց, որ Թուրքիայում խորհրդարան է անցել 4 կուսակցություն՝ «Արդարություն եւ զարգացում»-ը, Ժողովրդա-հանրապետականը, «Ազգայնական շարժում»-ը եւ «Ժողովուրդների դեմոկրատական» կուսակցությունը։ «Վերջին երեքը հավաքել են մանդատների 60 տոկոսը։ Եթե նրանք կարողանան կոալիցիա ձեւավորել, «Արդարություն եւ զարգացում»-ը կդառնա փոքրամասնություն։ Սակայն «Ազգայնական շարժումը» համառորեն չի ուզում կոալիցիա ձեւավորել «Ժողովուրդների դեմոկրատական կուսակցության» հետ»- նշեց Չաքրյանը։
Էրդողանի խնդիրն է ոչ միայն իր կուսակցությունը պահել իշխող դիրքերում, այլ նաեւ բավարար ձայներ հավաքել՝ կառավարման նախագահական համակարգի անցնելու համար։
Նշենք, որ հունիսի 7-ին տեղի ունեցած խորհրդարանական ընտրություններում իշխող կուսակցությունը հավաքել է ընդամենը 40,8 տոկոս,CHP-ն՝ 25, MHP-ն՝16,3 եւ քրդական HDP-ն՝ 13,07 տոկոս:
