2015թ. Սեւանում ջրահեղձվել է 2 մարդ, որից մեկը` սեզոնից դուրս: Այս մասին այսօր՝ հուլիսի 31-ին, լրագրողներին ասաց ՀՀ ՏԿԱԻՆ ՓԾ Գեղարքունիքի մարզային փրկարարական վարչության հատուկ ջրափրկարարական ջոկատի հրամանատար, փ/ծ ավագ լեյտենանտ Արմեն Ճզմաչյանը՝ նշելով, որ նախորդ տարիների համեմատ այս տարի դժբախտ պատահարների թիվն էապես չեն փոխվել, միայն ավելացել են 911-ին ահազանգերի թիվը:
«2013թ. Սևանում ջրահեղձվել է 5 մարդ, որից 4-ը` սեզոնից դուրս, 2014թ.` 4 հոգի, բոլորն էլ սեզոնի ընթացքում: Իսկ այս տարի գրանցվել է 2 դեպք, որից մեկը` սեզոնից դուրս: 2013թ. մեր ջոկատի կողմից փրկվել է 22 հոգի, անցած տարի՝ 26 հոգի, իսկ այս տարի արդեն մեկ ամսում՝ 16 հոգի»,-ասաց Արմեն Ճզմաչյանը:
Ջրափրկարարական ջոկատի հրամանատարը դժբախտ պատահարներից խուսափելու համար Սեւանում հանգստացողներին խորհուրդ տվեց ալկոհոլ օգտագործելուց հետո ջուրը չմտնել, չլողալ լճի անծանոթ վայրերում, հնարավորության դեպքում լողալ այնտեղ, որտեղ կան փրկարարական կետեր, զննել լողափի ռելիեֆը, ուշադիր լինել սուր, կտրող, ծակող առարկաներից, լսել փրկարարների ցուցումները, պահպանել անվտանգության կանոնները:
Արմեն Ճզմաչյանը նաեւ նշեց, որ հունիսի 1-ից հատուկ ջրափրկարար ջոկատն անցել է ուժեղացված ռեժիմով ծառայության եւ բացի կենտրոնական կայանից փրկարարները ծառայություն են իրականացնում նաև Սևանի ավազանի 3 հանրային լողափերին:
«Կենտրոնական կայանում ջրափրկարարական ծառայությունն իրականացվում է 24 ժամյա հերթապահուոյուն, իսկ հանրային լողափերին՝ առավոտյան 9:00-ից մինչև երեկոյան 21:00-ը»,-հավելեց նա: