Արտոնություններ ունեցող հիվանդներին պետք է հնարավորություն տրվի ինքնուրույն ընտրել իրենց դեղորայքը։ Այս մասին հուլիսի 31-ին լրագրողներին հայտարարեց «Իրազեկ եւ պաշտպանված սպառող» ՀԿ նախագահ Բաբկեն Պիպոյանը։
Նրա խոսքով՝ ավելի ճիշտ է որոշակի գումար հատկացնել, որի սահմաններում սպառողը կարող է նշված անվանական ցուցակից ընտրել իր դեղորայքը։ Նրան կոնկրետ դեղ տալ, նշանակում է ոտնահարել ընտրության իրավունքը։
«Չէ՞ որ Արեւմուտքում էլ մարդուն որոշակի դեղամիջոց են նշանակում, բայց ոչ կոնկրետ արտադրողի դեղը։ Բնականաբար խոսքն այն դեպքերի մասին չէ, երբ բժշկի դեղատոմսով կոնկրետ դեղեր են նշանակվում։ Անհրաժեշտ է նաեւ մեխանիզմներ մշակել, որոնց դեպքում հիվանդը կարող է այդ գումարը ծախսել միայն առողջապահության վրա։ Օրինակ զգուշացնել, որ ամսվա վերջում նա պարտավոր է պոլիկլինիկա ներկայացնել դեղատան կտրոնները»,- նշեց Պիպոյանը։
