Վրացի զինվորականները ուսուցման կուրս կանցնեն արտասահմանում ֆրանսիացի հրահանգիչների հրամանատարության ներքո։ Վրաստանին նման պայմաններ են ներկայացրել Ֆրանսիայից ՀՕՊ սարքավորումներ գնելու համար։
Զինվորականների առաջին խումբը կմեկնի ուսումնառության արդեն 2016թ., ասել է Վրաստանի պաշտպանության նախարար Թինա Խիդաշելին։
«Ձեզ հայտնի է, որ համաձայնությունն արդեն ստորագրվել է։ Կառավարության նիստում այսօր հաստատվել է դրա ֆինանսական մասը։ Առաջիկա տարվա ընթացքում համապատասխան զորակազմը կուղեւորվի Ֆրանսիա ուսուցման համար։ Ֆրանսիացիները նույնպես Վրաստան կգան մեր զինծառայողներին նախապատրաստելու համար»,- ասել է նախարարը, գրում է «Գրուզիա Օնլայն»-ը։
Հուլիսի 10-ին Վրաստանի պաշտպանության նախարարը Փարիզում ֆրանսիական MBDA ընկերության հետ նորագույն ՀՕՊ համալիրների մատակարարման համաձայնագիր էր ստորագրել։