Բրիտանական The Independent թերթի ճանապարհորդությունների սյունակում հայկական սուրբ Ղազար կղզու մասին հոդված է լույս տեսել։

«Օսմանյան կայսրությունում Հայոց ցեղասպանության 100-ամյակի կապակցությամբ Սուրբ Ղազար կղզին հատուկ նշանակություն է ստանում։ Բորոտներով բնակեցված կղզին նվիրվել էր հայ Մխիթար վանականին, որը հալածանքների պատճառով փախել էր Կոստանդնուպոլսից»,- ասված է հոդվածում։

Հաղորդվում է, որ անգամ Նապոլեոնը, որը վանքերի հանդեպ սեր չէր տածում, ապշած էր մնացել եւ փրկել էր կղզին ոչնչացումից։ Այսօր կղզում ապրում է 12 գիտնական վանական եւ 5 վանական եղբայր, որոնց պահպանությանն է հանձնված 200 000 գիրք, 4.500 հազվագյուտ ձեռագիր եւ էզոտերիկ գանձերի հավաքածուներ։

«Հայկական գանձերի թանգարանում կան հսկայական կտավներ, Բրոնզի դարին պատկանող մետաղական աշխատանքներ, մ.թ.ա. 1-ին դարի ոսկյա դրամներ, Հայաստանի Առաջին Հանրապետության տպագրության նմուշներ եւ 1366թ. կռած՝ Կիլիկյան Հայաստանի Լեւոն 6-րդ Լուսինյան թագավորի թուրը»,- պատմում է հեղինակը։

Հոդվածում նշվում է, որ վանքի հոգին պահվում է 3 գրադարաններում՝ հիասքանչ մոնումենտալ գրադարանից, որի գրադարակներում հազվագյուտ եվրոպական հատորներ են պահվում, Բայրոնի սենյակով մինչեւ ձեռագրերի կլոր սրահը, որտեղ պահվում է աշխարհում ամենակարեւոր հայկական ձեռագրերի հավաքածուներից մեկը, այդ թվում՝ 862թ. գրված Աստվածաշունչը։ Գրադարանում պահվում են նաեւ վաղ հայերեն թարգմանություններ, օրինակ, Փիլոն Ալեքսանդրիացու, Հեսեոդոսի եւ Հովհաննես Ոսկեբերանի ստեղծագործությունները, որոնց բնօրինակները չեն պահպանվել, սակայն վանականները, դրանք թարգմանելով լատիներեն, այդպիսով նոր կյանք հաղորդել այդ գործերին։