Մոլդովայի ոստիկանությունը հուլիսի 31-ի երեկոյան Քիշնեւում վերացրել է գազի ու էլեկտրաէներգիայի սակագների բարձրացման դեմ բողոքող ցուցարարների վրանային ճամբարը: Դա արվել է այն բանից հետո, երբ Քիշնեւի վերաքննիչ պալատը անօրինական է համարել գործարար, Դեմոկրատական կուսակցության փոխնախագահ Վլադիմիր Պլախոտնյուկի տան մոտ ճամբար կազմակերպելը:
Մի քանի տասնյակ ցուցարարներ մնացել են ակցիայի վայրում: «Մենք ամեն օր գալու ենք այստեղ, մինչեւ չեղյալ հայտարարվի սակագների բարձրացման որոշումը»,-ասել է ցույցի կազմակերպիչներից մեկը՝ «Կարմիր բլոկ» կուսակցության առաջնորդ Գրիգորի Պետրենկոն:
Պլախոտնյուկի տան մոտ բողոքի ակցիան սկսվել է նախորդ շաբաթվա վերջին:
Հուլիսի 31-ին Monitorul Oficial պետական պաշտոնական պարբերականը հրապարակել է Էներգետիկ ոլորտի կարգավորման ազգային գործակալության որոշումը, որով գազի ու էլեկտրաէներգիայի սակագները բարձրանում են մոտ 15 տոկոսով:
«Մոլդովագազ» ընկերությունը, որը ռուսական «Գազպրոմի» դուստր ձեռնարկությունն է, պահանջել է սակագները բարձրացնել 51 տոկոսով, սակայն այն բարձրացվել է միայն 15 տոկոսով:
