Գորիսի «Սդղի գյոլում» մայիսի 2-ին Զաքարյան եղբայրների առողջությանը վնաս հացնելու համար հուլիսի 27-ից կալանավորված՝ Սյունիքի մարզպետի որդուն արգելում են տեսակցել նույնիսկ ընտանիքի անդամների հետ: Այս մասին NEWS.am-ի թղթակցին ասաց մարզպետի որդու՝ Տիգրան Խաչատրյանի փաստաբան Արմեն Մելքոնյանը:
«Հենց առաջին օրվանից բոլոր տեսակցություններն արգելել են, միայն ինձ են թույլ տալիս տեսակցել: Գործով մյուս կալանավորվածների դեպքում էլ են տեսակցություններն արգելված»,- ասաց փաստաբանը:
Արմեն Մելքոնյանը մի քանի օր առաջ տեսակցել է իր պաշտպանյալի հետ: Թեեւ Տիգրան Խաչատրյանը կալանավայրի պայմաններից չի դժգոհել, առողջական խնդիրներ է ունեցել: Թե ինչ կոնկրետ ինչ խնդիրներ է ունեցել, փաստաբանը հրաժարվեց ասել:
Նշենք, որ տուժող Հարություն Զաքարյանը հայտարարել է, որ հենց Տիգրանն է իր աչքի վնասվածքը հասցրել, ինչից հետո ինքը կորցրել է տեսողությունը։ Տիգրան Խաչատրանը պնդում է, որ ներկա է եղել վեճին, սակայն որեւէ մեկին վնասվածք չի հասցրել, ինքը միայն փորձել է բաժանել վիճողներին։ Հուլիսի 27-ին Տիգրան Խաչատրյանին մեղադրանք է առաջադրվել Քրեական օրենսգրքի 112-րդ հոդվածի 1-ին մասով: Խափանման միջոց է ընտրվել կալանավորումը:
Ավելի վաղ Քննչական կոմիտեն հաղորդել էր, որ 2015թ. մայիսի 2-ին՝ ժամը 17:00-ի սահմաններում, տեղի է ունեցել վիճաբանություն՝ դրանից ժամեր առաջ Գորիս քաղաքում տեղի ունեցած ավտովթարի կապակցությամբ, որի հետեւանքով վնասվել էր Մուշեղ Զաքարյանի վարած ավտոմեքենայի կողային հայելին։
Վիճաբանության ժամանակ մի խումբ անձանց կողմից բռնություն է գործադրվել Մուշեղ եւ Հարություն Զաքարյանների նկատմամբ, որի հետեւանքով Մ.Զաքարյանին պատճառվել է միջին ծանրության, իսկ Հ.Զաքարյանին` ծանր մարմնական վնաս:
