ԼՂՀ ՊԲ զորամասերից մեկի վաշտի հրամանատար Տարոն Գեդեոնյանը մեղադրվում է ավագ լեյտենանտ Տիգրան Սիմոնյանի սպանության մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Տարոն Գեդեոնյանը մարտական դիրքում օգտագործել է ոգելից խմիչք, լիցքավորել է իրեն ամրակցված ինքնաձիգը եւ արձակել կրակահերթ: Արձակված կրակոցներից ավագ լեյտենանտ Տիգրան Սիմոնյանը ստացել է հրազենային վիրավորումներ եւ Մարտակերտի հոսպիտալ տեղափոխվելու ճանապարհին մահացել:
Սույն գործով մեղադրանք է առաջադրվել նաեւ զինծառայողներ Սերյոժա Կարապետյանին եւ Շիրազ Գասպարյանին, որոնք մեղադրվում են դիտավորությամբ 11 հատ փամփուշտ ոնչնացնելու մեջ:
Տարոն Գեդեոնյանին մեղադրանք է առաջադրվել Քրեական օրենսգրքի 365-րդ հոդվածի 3-րդ մասով: Նա կալանավորված է: Մյուս երկու զինծառայողներին մեղադրանք է առաջադրվել Քրեական օրենսգրքի 369-րդ հոդվածի 1-ին մասով: Նրանք հանձնվել են հրամանատարության հսկողությանը:
Գործը քննվում է Սյունիքի մարզի ընդհանուր իրավասության դատարանում:
Ավելի վաղ տեղեկացրել ենք, որ փետրվարի 10-ին ժամը 19:55-ի սահմաններում, N զորամասի մարտական դիրքում մարտական հերթապահություն կրելու կանոնները խախտելու հետեւանքով արձակված կրակոցների արդյունքում հրազենային վնասվածքներ է ստացել նույն զորամասի զինծառայող, ավագ լեյտենանտ Տիգրան Սամվելի Սիմոնյանը եւ մահացել:
Դեպքի առթիվ ՀՀ Քննչական Կոմիտեի զինվորական քննչական գլխավոր վարչությունում հարուցվել է քրեական գործ՝ ՀՀ քրեական օրենսգրքի 365-րդ հոդվածի 3-րդ մասով (մարտական հերթապահություն կամ մարտական ծառայություն կրելու կանոնները խախտելը՝ որն առաջացրել է ծանր հետեւանքներ):
