Սիրիան, հենվելով սեփական ժողովրդի, փառապանծ բանակի եւ հավատարիմ ընկերների ջանքերի վրա, կհաղթահարի բոլոր ագրեսիվ պլանները։ Այս մասին ասված է Սիրիայի նախագահ, երկրի Զինված ուժերի գերագույն գլխավոր հրամանատար Բաշար Ասադի ուղերձի մեջ, որը նա հղել է Սիրիայի Արաբական Բանակի կազմավորման 70-ամյակի կապակցությամբ։
Նա հիշեցրել է, որ բանակը Սիրիայի պաշտպանության, Հայրենիքի տարածքային ամբողջականության պահպանման գործում փայլուն պատմություն ունի եւ այսօր, պայքարելով արտաքին ավազակային խմբավորումների դեմ, շարունակում է հերոսական ավանդույթները՝ ողջ աշխարհին հայտարարելով, որ ֆաշիզմը, ահաբեկչությունն ու ծայրահեղականությունը տեղ չունեն։
«Չնայած բոլոր մարտահրավերներին՝ ժողովրդական աշխարհազորային ջոկատների եւ նրանց կողքին ամուր կանգնած սիրիացի ժողովրդի աջակցությամբ Սիրիայի Արաբական Հանրապետության բանակը անպայման հաղթանակ կտանի բոլոր ահաբեկիչների եւ նրանց տերերի նկատմամբ, որոնք գիտեն, որ Սիրիան երբեք չի հրաժարվի ինքնիշխանության, անկախության եւ իր որդիների ձեռքերով ապագա կառուցելու իր օրինական իրավունքներից։ Սիրիացի ժողովուրդը շնորհակալ է յուրաքանչյուր զինվորի՝ այս սարսափելի մարտում կատարած յուրաքանչյուր սխրանքի համար։ Սիրիայի Արաբական Բանակը պաշտպանում է յուրաքանչյուր սիրիացու պատիվը ահաբեկիչներից եւ վարձկաններից երկիրն ազատագրելու այս պայքարում, որոնց աջակցում է ամերիկա-իսրայելական դաշինքը»,- ասել է Ասադը իր ուղերձում, փոխանցում է ՍԱՆԱ գործակալությունը։