ՀՀԿ-ն երկրի ղեկավարի իր հաջորդ թեկնածուի մասին կխոսի միայն այն ժամանակ, երբ սահմանադրական բարեփոխումների նախագիծը ընդունված կլինի: Այս մասին այսօր՝ օգոստոսի 1-ին, Գյումրիում լրագրողների հետ զրույցում ասաց ՀՀ վարչապետ Հովիկ Աբրահամյանը:
«Սահմանադրական բարեփոխումները դեռ ընթացքի մեջ են, դրա մասին կխոսենք, երբ ժողովրդի կողմից դա կընդունվի: Մինչեւ օգոստոսի սկիզբ հանձնաժողովը նախագիծը պետք է ուղարկի Ազգային ժողով եւ երբ Ազգային ժողովը կընդունի նախագիծը եւ այն կարժանանա հանրության հավանությանը, այն ժամանակ դրա մասին կխոսենք»,- ասաց վարչապետը:
Հիշեցնենք, որ սահմանադրական բարեփոխումների աաջարկված նախագծով երկրի առաջին դեմքը դառնալու է վարչապետը, որին առաջադրելու է Ազգային ժողովում մեծամասնություն ձեւավորած կուսակցությունը: Նախագահ Սերժ Սարգսյանն արդեն հայտարարել է, որ մտադիր չէ առաջադրվել ոչ վարչապետի, ոչ նախագահի, ոչ էլ Ազգային ժողովի նախագահի պաշտոններում:
