«Աստղային պատերազմներ. 7-րդ դրվագ՝ ուժի զարթոնք» ֆիլմի նկարահանման ժամանակ հոլվիդուցի ռեժիսորը կոտրել է ողնաշարը՝ փորձելով դերասան Հարիսոն Ֆորդին դուրս բերել նրա վրա ընկած տիեզերանավի դռան տակից։ Երկար ժամանակ Ջեյ Աբրամսը կորսետ էր կրում, սակայն բժիշկներից բացի այդ մասին ոչ ոք չգիտեր։

Ամերիկյան հեռուստաընկերություններից մեկին տված հարցազրույցում ռեժիսորը պատմել էր, որ անցյալ նոյեմբերին՝ նկարահանումների ժամանակ, Ֆորդի վրա ընկել էր հիդրավլիկ շարժակը։ Փորձելով ազատել նրա ոտքը եւ մի կողմ քաշել ծանր դուռը՝ ռեժիսորը ողնաշարի մեջ ճթոց էր լսել, սակայն բժշկի էր դիմել միայն մի քանի օր անց։ Բժիշկը հայտնել էր, որ նա կոտրել է 4-րդ գոտկային ողը։

Հարիսոն Ֆորդի ոտքը նույնպես վիրահատել էին, եւ մի քանի ամիս դերասանը քայլում էր հենակներով եւ ոտքը գիպս դրած, փոխանցում է ՏԱՍՍ-ը։

Այդուհանդերձ ֆիլմի նկարահանումները հաջողվել է ավարտել ժամանակին։ Ֆիլմը վարձույթի կհանվի 2015թ. դեկտեմբերի 18-ին։