Սիեթլյան հեռուստաալիքի սեփականատեր եւ «Քուրթ Քոբեյնին սպանել են» հաղորդման հեղինակ Ռիչարդ Լին դիմել է դատարան՝ պահանջելով թույլ տալ իրեն հրապարակել հայտնի երաժիշտի մահից հետո արված լուսանկարները, որոնք իբր, հաստատում են Nirvana խմբի անդամի սպանության վարկածը:
Լին երկար տարիներ զբաղվում է Քոբեյնի խորհրդավոր մահվան հետաքննությամբ եւ համարում է, որ լուսանկարները կօգնեն իրեն բոլորին ապացուցել, որ երաժիշտին սպանել են, հաղորդում է Sputnik-ը:
Միաժամանակ, Քուրթ Քոբեյնի այրին՝ Քորթնի Լավը եւ նրա դուստրը՝ Ֆրենսիսը, դեմ են հանդես եկել այդ լուսանկարների հրապարակմանը: Նրանք պնդում են, որ երբեք լուսանկարներ չեն տեսել դեպքի վայրից, ուստի շատ տհաճ կլինի դրանք տեսնելը:
Հիշեցնենք, որ իրավապահների պաշտոնական վարկածով, Քուրթ Քոբեյնը, գտնվելով թմրանյութերի ազդեցության տակ, ինքնասպան է եղել՝ կրակելով գլխին: Nirvana խմբի շատ երկրպագուներ մինչ օրս այդ հարցում մեղադրում են Քորթնի Լավին: