«Մենք խաղաղության կողմնակից ենք» բարեգործական նախագծի անդամները, որոնք կազմակերպել են Մոսկվա–Երեւան ավտոմոտոցիկլաերթ, այսօր` օգոստոսի 1–ին, հասել են Երեւան։

Երթի գլխավոր նպատակը, ըստ նախագծի կազմակերպիչների, իրենց  փոքր ներդրումն է Հայոց Ցեղասպանության ճանաչման գործում:

Ցեղասպանության 100–րդ տարելիցին նվիրված երթին ի սկզբանե մասնակցել է 30 մոտոցիկլավար` հայեր եւ ռուսներ, սակայն Վրաստանի սահմանը տարբեր պատճառներով կարողացել են հատել միայն 2–ը, եւ երկու ավտոմեքենա։ Մյուսները ընկերներին կմիանան երկուշաբթի. նրանք Հայաստան կժամանեն օդանավով։

NEWS.am–ի հետ զրույցում երթի կազմակերպիչ Զորիկ Թովմասյանը նշեց, որ նախագծի անդամները Հայաստանում կմնան երկու շաբաթ, այդ ընթացքում երթեր կիրականացնեն դեպի Հայաստանի մի շարք բնակավայրեր և Արցախ:

Նախագծի մասնակիցները պատրաստվում են նաև ամբողջ կազմով այցելել Ծիծեռնակաբերդի հուշահամալիր:

Նշենք, որ ավելի վաղ լրատվամիջոցներում տեղեկություն էր տարածվել, որ հուլիսի 31–ին Հայաստան են ժամանելու «Գիշերային գայլեր» մոտոակումբի ներկայացուցիչները Հայոց ցեղասպանության 100-րդ տարելիցին նվիրված մոտոերթով։ Այսօր Երեւան ժամանակ բայքերների ներկայացուցիչ Անի Մարգարյանը, սակայն, NEWS.am–ի հետ զրույցում վստահեցրեց, որ նրանք «Գիշերային գայլերի» հետ որեւէ առնչություն չունեն։ Ռուսաստանի հայերի միության փոխնախագահ Լեւոն Մուկանյանը մեզ հետ զրույցում ոչ հերքեց, ոչ հաստատեց «Գիշերային գայլերի» ժամանելու տեղեկությունը` նշելով, որ «Ռուսաստանի ցանկացած քաղաքացի կարող է լինել «Գիշերային գայլեր» ակումբի անդամ»։