Էլեկտրաէներգիայի սակագնի թանկացման դեմ բողոքի ցույցերը Երեւանում հիմնականում ավարտվեցին, սակայն իր դաշնակից Ռուսաստանի հետ Հայաստանի հարաբերությունների հարցը միայն ժամանակավոր է հետաձգվել: Այս մասին «Foreign Policy» պարբերականում գրել է վերլուծաբան Մայքլ Սեսիրը:
Սկզբում ցուցարարների եւ կառավարության պնդումները, թե էլեկտրական Երեւանը ոչ մի ընդհանուր բան չունի Մայդանի հետ, տրամաբանական էր: «Ի վերջո, ցույցերն անցկացվում էին Հայաստանում, ոչ թե Ուկրաինայում»,- գրում է վերլուծաբանը՝ հավելելով, որ հաշվի առնելով Մոսկվային միակողմանի տնտեսական կախվածությունը, Հայաստանը չի կարող ամբողջ կյանքում հետաձգել ռուսական գործոնի խնդիրները:
«Ամեն դեպքում, իրականությունն այնպիսին է, որ Հայաստանում ամբողջատիրությունն ու Ռուսաստանի գերակայությունը փոխլրացնում են միմյանց: Հայաստանի խնդիրները տեղի չեն ունենում վակուումի մեջ, հակառակը, անմրցունակ տնտեսությունն ու ոչ լիբերալ քաղաքական համակարգը լրացվում են Մոսկվային ենթարկվելով»,- գրում է հեղինակը:
Նա հիշեցնում է, որ «Հայաստանի էլցանցերը» պատկանում են «Ինտեր ՌԱՕ»-ին, իսկ երկրի գազային համակարգն ամբողջությամբ «Գազպրոմ»-ի ենթակայության տակ է:
Հոդվածի հեղինակի կարծիքով, թեեւ երկրում տիրող իրավիճակի համար պատասխանատվության առյուծի բաժինը Հայաստանի կառավարությանն է, «ցուցարարների կողմից Ռուսաստանի գործոնի բացթողումն անտեսում է դաժան քաղաքական իրականությունը»:
Միաժամանակ, վերլուծաբանն ընդգծում է, որ Իրանի հետ գործարքից հետո Հայաստանը կարող է տարանցիկ գոտի դառնալ իրանական առեւտրի եւ էներգետիկ ռեսուրսների համար: Սեսիրի կարծիքով, Թուրքիայի հետ հարաբերությունների կարգավորումն ու Հարավային Կովկասի հանդեպ Պեկինի աճող հետաքրքրությունը կարող են օգնել Հայաստանին: Այս ամենը մեկ օրում տեղի չի ունենա, Ռուսաստանն էլ կշարունակի դիմակայել ցանկացած նոր ներդրումների եւ ազդեցությունների, սակայն հոդվածագիրը հույս դնում է քաղաքացիական հասարակության վրա:
Ամփոփելով՝ Մայքլ Սեսիրը հայտարարում է, որ Երեւանում անցկացված ցույցերի դրական արդյունքն այն է, որ քաղաքացիական հասարակությունը կարողացավ Հայաստանի վերնախավին բանակցությունների սեղանի շուրջ բերել: «Սա կարեւոր նախադեպ է եւ կարող է մեկնակետ դառնալ ապագա բանակցությունների համար»,- գրում է հեղինակը՝ հավելելով. ամռան իրադարձությունները ցույց տվեցին, որ առաջընթացը հնարավոր է: