էլեկտրաէներգիայի թանկացման որոշումը չեղարկելու պահանջով Հանրապետության հրապարակում արդեն 6-րդ օրը նստացույց անցկացնող «Ոտքի Հայաստան» շարժումը պահանջում է Հանրային ծառայությունները կարգավորող հանձնաժողովի հրաժարականը: Այս մասին այսօր՝ օգոստոսի 1-ին, հայտարարեցին նախաձեռնության անդամները:
«ՀԾԿՀ-ն մինչեւ այսօր որոշումներ կայացնելիս հաշվի է առել պահանջող կողմի շահը, եւ ժողովրդի շահը միշտ ստորադասվել է: Բայց ՀԾԿՀ-ն ստեղծված չի, որ պաշտպանի ՀԷՑ-ի ու այն մարդկանց շահերը, որ ղեկավարում են այն: Այն ստեղծված է, որ բալանս պահի, պաշտպանի ժողովրդի շահերը, ինչը չի անում»,- ասաց նախաձեռնության խորհրդի անդամ Գագիկ Եղիազարյանը՝ նշելով, որ միեւնույն ժամանակ, իրենք պահանջում են նաեւ ազգայնացնել ՀԷՑ-ը:
Անդրադառանալով վարչապետի հայտարարությանը, որ էլեկտրաէներգիայի թանկացումը կսուբսիդավորվի «Որոտան» կասկադի վաճառքից ստացված գումարից, Գագիկ Եղիազարյանը նշեց, որ իրենք դեմ են, որ ազգային ընկերության վաճառքից ստացված գումարով վճարվեն օտար ընկերության պարտքերը:
Հիշեցնենք, որ այսօրվանից ուժի մեջ է մտել էլեկտրաէներգիայի սակագնի բարձրացման որոշումը: Վարչապետ Հովիկ Աբրահամյանը հայտարարել է, որ ավելացված 6.93 դրամը կսուբսիդավորվի արտաբյուջետային միջոցներից՝ «Որոտան» կասկադի վաճառքից ստացված գումարից:
