ՀՀ արդարադատության նախարարության «Արթիկ» քրեակատարողական հիմնարկի դատապարտյալ Վլադիմիր Խ.-ն հաղորդում է տվել այն մասին, որ իր եւ մյուսների վերաբերյալ նախկինում քննված քրեական գործի նախաքննության ընթացքում փողոցից ոստիկանները բռնի ուժով իրեն տարել են ոստիկանության բաժին, որտեղ բաժնի աշխատակիցներից մեկը ափիոն տեսակի թմրամիջոց է գցել գրպանը:

ՀՔԾ մամուլի ծառայությունից հայտնում են, որ դրանից հետո հրավիրված ընթերակաների ներկայությամբ ոստիկանության աշխատակիցները կազմել են արձանագրություն, թե, իբր, խոշոր չափերով ափիոն տեսակի թմրամիջոց են հայտնաբերել իր գրպանից:

Այնուհետեւ նույն բաժնի պաշտոնատար անձինք բռնություն են գործադրել իր նկատմամբ եւ սպառնալիքներ տվել՝ ստիպելով խոստովանել, թե, իբր, անձամբ իրացրել է խոշոր չափերով թմրամիջոց եւ տեղյակ է իր հետ նույն գործով անցնող անձանց կողմից թմրամիջոցների իրացման մանրամասների մասին:

Բռնության գործադրմամբ զուգորդված պաշտոնեական լիազորություններն անցնելու, հետաքննություն կատարող անձանց կողմից բռնությամբ զուգորդված ցուցմունք տալուն հարկադրելու եւ խոշոր չափերով թմրամիջոց իրացնելու դեպքերի առթիվ ՀՀ հատուկ քննչական ծառայությունում ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 309-րդ հոդվածի 2-րդ մասով եւ 341-րդ հոդվածի 2-րդ մասով հարուցվել է քրեական գործ:

Կատարվում է նախաքննություն: