«Նաիրիտ» գործարանի ներկա եւ նախկին աշխատակիցներն այսօր՝ օգոստոսի 3-ին, հավաքվել են Կառավարության շենքի դիմաց եւ պահանջում են փոխանցել գործարանի եւս 600 աշխատակցի դեռ չվճարված աշխատավարձերը եւ գործարանի վերագործարկում: Այս մասին NEWS.am-ին ասաց գործարանի նախկին աշխատակից Անահիտ Մանուկյանը:
«Գործարանի վերագործարկումը ոչ միայն նոր աշխատատեղերի հնարավորություն է, այլ Հայաստանի հարստացման ճանապարհ: Մեր աշխատավարձերի փոխանցումից հետո էլ շարունակելու ենք պայքարը եւ պահանջելու ենք գործարանի վերագործարկում»,- ասաց նա:
Գործարանի մամուլի նախկին քարտուղար Անուշ Հարությունյսանն էլ նշեց, որ նաիրիտցիների աշխատավարձերի փոխանցումը այս Կառավարության համար դրական նշանակություն ունեցավ, քանի որ վարչապետ Հովիկ Աբրահամյանը կարողացավ լուծում տալ նախկին վարչապետ Տիգրան Սարգսյանի կողմից ստեղծված խնդրին:
«600 Նաիրիտցիների աշխատավարձը ես վստահ եմ, որ այսօր՝ մինչեւ երեկոյան, կփոխանցվի: Մենք այսօր հավաքվել ենք ավելի շատ իրար շնորհավորելու եւ կանգնելու այն նաիրիտցիների կողքին, որոնք դեռ չեն ստացել իրենց աշխատավարձը: Չենք կարող ժխտել, որ մեր երկարատեւ պայքարն արդյունք տվեց եւ Հովիկ Աբրահամյանը կարողացավ լուծում տալ նախկին Կառավարության ստեղծած խնդրին»,-ասաց նա:
Նշենք, որ նաիրիտցիներն այսօր կառավարության մոտ կմնան մինչեւ ժամը 13:00-ն:
Հիշեցնենք, որ գործարանի աշխատակիցների աշխատավարձը հատկացնում է պետությունը՝ էներգետիկայի ոլորտի պետական ընկերությունների շահույթի հաշվին: 2400 նաիրիտցիներից 1800-ն արդեն ստացել է աշխատավարձերը, մնացած 600 աշխատակցի աշխատավարձերը խոստացել են փոխանցել այսօր:
Նաիրիտցիները բազմիցս բողոքի ակցիաներ են կազմակերպել կառավարության ու նախագահի նստավայրի մոտ՝ պահանջելով լուծում տալ իրենց խնդրին: Ձեռնարկությունը չի աշխատում 2010 թվականի ապրիլից: