Ամենայն հայոց կաթողիկոս Գարեգին Բ-ի հայրապետական տնօրինությամբ Հոգեշնորհ Տ. Նարեկ վարդապետ Ավագյանը նշանակվել է Արթիկի թեմի առաջնորդական տեղապահ:
Տ. Նարեկ վարդապետ Ավագյան (կենսագրություն)
Ծնվել է 1979 թ. օգոստոսի 12–ին, Արագածոտնի մարզի Օշական գյուղում:
1986–1996 թթ. սովորել է Օշականի Ս. Մեսրոպ Մաշտոցի անվան միջնակարգ դպրոցում:
1996–2002 թթ. սովորել է Մայր Աթոռ Սուրբ Էջմիածնի Հոգեւոր Ճեմարանում (այժմ` Գեւորգյան Հոգեւոր Ճեմարան–Համալսարան):
2001 թ. դեկտեմբերի 25–ին` Սուրբ Ստեփանոս Նախավկայի տոնին, ձեռամբ Շիրակի թեմի Առաջնորդ Գերաշնորհ Տ. Միքայել եպս. Աջապահյանի, Երեւանի Սուրբ Գրիգոր Լուսավորիչ Մայր Եկեղեցում ձեռնադրվել է սարկավագ:
2002 թ. հուլիսի 6–ին Վեհափառ Հայրապետի տնօրինությամբ աշխատանքի է նշանակվել Մայր Տաճարում` որպես լուսարար:
2002 թ. դեկտեմբերի 10–ից մինչեւ 2003 թվականի փետրվարի 10–ը աշխատել է Մայր Աթոռ Սուրբ Էջմիածնի Վարչակազմակերպական գործերի կառավարչի գործավար–քարտուղար:
2003 թ. փետրվարի 10–ից մինչեւ 2005 թ դեկտեմբերի 9-ը աշխատել է Մայր Աթոռում` որպես պարետ:
2003 թ. մայիսի 26–ին պաշտպանել է ավարտաճառ «Համատեսական Ավետարանների արեւելահայերեն թարգմանության դարձվածային միավորները» թեմայով:
2003 թ. օգոստոսի 31–ին Աստվածածնի գոտու գյուտի տոնի օրը, ձեռամբ Գերաշնորհ Տ. Շահան արք. Սվաճյանի, ձեռնադրվել է կուսակրոն քահանա:
2005 թ. դեկտեմբերի 9–ից նշանակվել է Աբխազիայի հոգեւոր հովիվ:
2006 թ. ապրիլի 28–ին վերադարձել է Հայաստան եւ կրկին աշխատանքի անցել Մայր Աթոռում որպես պարետ:
2006 թ. նոյեմբերի 1–ից մինչեւ 2007թ. մարտի 1-ը եղել է Մայր Աթոռ Ս. Էջմիածնի Մկրտարանի տեսուչ:
2007 թ. մարտի 1–ից մինչեւ 2013 թ. փետրուարի 28-ը եղել է Սուրբ Խոր Վիրապ վանքի վանահայր:
2013 թ. մարտի 1-ին նշանակվել է Մայր Աթոռի Ներսիսյան անտառի մանկական խաղահրապարակի տնօրեն:
2013 թ. հոկտեմբերի 5-ին պաշտպանել է վարդապետական թեզ «Թաղման ծեսն ըստ ձեռագիր եւ տպագիր «Մաշտոցների» ԺԶ-ԺԸ դդ. եւ ժողովրդական սովորությունները» թեմայով: Նույն թվականի հոկտեմբերի 11-ին ձեռամբ Շիրակի թեմի առաջնորդ Տ. Միքայել եպս. Աջապահյանի Օշականի Ս. Մեսրոպ Մաշտոց եկեղեցում ստացել է մասնավոր վարդապետական աստիճան:
2013 թ. նոյեմբերի 1-ին Վեհափառ Հայրապետի տնօրինությամբ ծառայության է նշանակվել Իրաքի Հայոց թեմում:
2014 թ. դեկտեմբերի 1-ից ծառայության է անցել Գեւորգյան Հոգեւոր Ճեմարանում` որպես ավագ վերակացու եւ դասախոս: