Առաջիկա մի քանի տարվա ընթացքում Հնդկաստանը նավթի ռազմավարական պահուստ կստեղծի գրեթե 18 միլիոն տոննայի չափով։ Այդ մասին հաղորդել է Հնդկաստանի ֆինանսների, կորպորացիաների, տեղեկատվության եւ հեռուստահաղորդակցության հարցերով նախարար Հարուն Ջեյթլին, փոխանցում է «ԻԱՆՍ» տեղեկատվական գործակալությունը։
Նրա խոսքով, առաջին փուլում կառանձնացվի 11,5 միլիարդ ռուփի (գրեթե 200 միլիոն դոլար) Հնդկաստանի հարավ-արեւելքում գտնվող Անդհրա-Պրադեշ նահանգի Վիշակհապատնամ քաղաքում առաջին պահուստարանի համար մոտավորապես 1,3 միլիոն տոննա նավթի գնման նպատակով։
Դրանից հետո հավանաբար մեկ տարվա ընթացքում կբացվի եւս երկու պահուստարան Մանգալոր եւ Պադուր քաղաքներում, որոնց համար կգնվի համապատասխանաբար 1,5 միլիոն եւ 2,5 միլիոն տոննա նավթ։ Պահուստարանների կառուցումը գրեթե ավարտված է։ Երկրորդ փուլում, որի իրականացման ժամկետը դեռ չի հստակեցվել, եւս 12,5 միլիոն տոննայի պահուստարաններ կստեղծվեն Չանդիկհոլում, Բիկաներում, Ռաջկոտում, փոխանցում է ՏԱՍՍ-ը։
Հնդկաստանը ներմուծում է իրեն անհրաժեշտ նավթի 80 տոկոսը։ Միջազգային էներգետիկ գործակալության կանխատեսումներով, մինչեւ 2020 թվականը երկիրը կդառնա աշխարհում ածխաջրածինների խոշորագույն գնորդը։ 2014-ին Հնդկաստանը օրական 3,86 միլիոն բարել նավթ է ներմուծել։