Անհրաժեշտ է հավասարեցնել ալկոհոլային խմիչքների վաճառքից գանձվող ակցիզային հարկի դրույքաչափերը Հայաստանում եւ ԵՏՄ այլ երկրներում։ Այդ մասին NEWS.am-ի թղթակցին հայտնել է Հայաստանում իշխող ՀՀԿ խմբակցության պատգամավոր, «Երեւանի գարեջուր» գործարանի բաժնետեր Հակոբ Հակոբյանը՝ մեկնաբանելով «Ակցիզային հարկի մասին» օրենքում փոփոխությունների նախագիծը։

Նրա խոսքով, դա կնպաստի ԵՏՄ երկրների բոլոր արտադրողների միջեւ ալկոհոլային խմիչքների շուկայում հավասար մրցակցության ապահովմանը։ «Այժմ Հայաստանում ակցիզներն ավելի ցածր են։ Ստացվում է, որ ռուսաստանցի արտադրողները հետաքրքրված են իրենց ապրանքը վաճառել Հայաստանում եւ ակցիզային ավելի քիչ հարկ մուծել։ Եթե հարկի դրույքաչափը հավասարեցվի, տեղական ընկերությունների գործը կհեշտանա։ Իհարկե, հավասարեցնելը նշանակում է, որ ավելի շուտ մենք պիտի դրույքաչափը բարձրացնենք՝ հասցնելով ԵՏՄ-ի մակարդակին, քան իրենք պիտի իջեցնեն մերի մակարդակին։ Այսինքն մեր արտադրած խմիչքները կթանկանան։ Բայց ամեն դեպքում մրցակցության ապահովման համար անհրաժեշտ է հավասարեցնել», - ասել է Հակոբյանը։

Նշենք, որ օրենքի նախագիծն առաջարկում է փոփոխել միայն օղու ակցիզային դրույքաչափը։ Ներկայիս դրույքաչափից (30%, բայց ոչ պակաս, քան 500 դրամ մեկ լիտրի համար) առաջարկվում է բարձրացնել (55%, բայց ոչ պակաս, քան 550 դրամ (ընդունված փոխարժեքով՝ 1,16 դոլար)։

Օրենքի նախագծի ուսումնասիրությունը սկսվել է հունիսին, բայց հետաձգվել է մինչեւ աշուն՝ պատգամավորների անբավարար քանակի պատճառով։ Օրենքի նախագիծը նաեւ առաջարկում է ժողովրդականություն չվայելող այնպիսի միջոց, ինչպիսին վառելիքի ակցիզային հարկի դրույքաչափի բարձրացումն է, այդ թվում նաեւ՝ սեղմված բնական գազի, որը երկրում մեքենաների գործածած հիմնական վառելանյութն է։