Հայաստանի ժողովրդի մեծ մասը «այո կասի սահմանադրական բարեփոխումներին: Այս մասին, այսօր՝ օգոստոսի 3-ին, մամուլի ասուլիսի ժամանակ հայտարարել է ՀՀԿ խմբակցության պատգամավոր Մկրտիչ Մինասյանը:
Նրա համոզմամբ, նրանք, որոնք պայքարում են սահմանադրական բարեփոխումների դեմ, չպետք է մոռանան, որ ժամանակին իրենք խոսում էին 100 տոկոսանոց համամասնական ընտրությունների եւ խորհրդարանական կառավարման անհրաժեշտության մասին:
«Քաղաքական ուժերին փաստացի հնարավորություն կտրվի դրսեւորել իրենց, բայց նրանք հիմա նորից դժգոհ են: Ինչի՞ց են դժգոհ: Այստեղ այլ բան կա. կան քաղաքական ուժեր, որոնք համարում են, որ իրենց պատիվ չի բերում մասնակցել համայնքային ընտրություններին: Կյանքը կստիպի, որ բոլորս հասկանանք, որ ընտրություններին մասնակցելը նորմալ է»,-նշել է Մինասյանը:
Պատգամավորի խոսքով, ժողովուրդը վստահորեն կընդունի, որ սահմանադրական բարեփոխումների ճանապարհը կբերի երկրի ավելի դինամիկ եւ արդյունավետ կառավարման:
Անդրադառնալով մտահոգություններին, որ ՀՀ-ում սահմանադրական բարեփոխումների արդյունքում միակուսակցական համակարգ կստեղծվի, ինչպես խորհրդային տարիներին, նա նշել է. «Ես ընդհանրապես նմանություն չեմ տեսնում: ՀՀԿ-ն չի կարող դառնալ Կոմունիստական կուսակցություն, դա պարզապես անհեթեթություն է»: