Հարկավոր է բարձրացնել թվային հեռուստատեսության մասին Հայաստանի քաղաքացիների տեղեկացվածությունը: Այս մասին NEWS.am-ի թղթակցի հետ զրույցում հայտարարեց «Ռեդինետ» ընկերության կոմերցիոն տնօրեն Ավետիք Քալանթարյանը, որը նախկինում ղեկավարում էր կաբելային հեռուստատեսության «Interactive TV» ընկերությունը:
«Հեռուստատեսային ընկերություններն արդեն մի քանի տարի ներդրումներ են կատարում ցանցի արդիականացման եւ թվային հեռարձակման նախապատրաստման համար: Հիմա հարկավոր է, որպեսզի այդ մասին իմանան հեռուստադիտողները: Հարկավոր է հնարավորինս հաճախ խոսել այդ մասին»,- ասաց Քալանթարյանը:
Հարցին, եթերի թվայնացումը չի՞ սահմանափակի IP-հեռուստատեսության շուկան, նա պատասխանեց. «Եկեք հարցն այդպես չդնենք: Ո՞ւմ շահերից է բխում եթերի արդիականացումը: Սպառողի՞: Ուրեմն՝ լավ է»:
Նշենք, որ Կառավարությունը հանրապետության հեռարձակման ցանցն արդեն նախապատրաստել է թվային եթերին, որը ներկայում գործում է անալոգայինին զուգահեռ: Մայրաքաղաք Երեւանում եւ Արարատյան դաշտում անվճար դիտման հասանելի կլինեն 18 ալիքներ, մյուս մարզերում՝ 9: