Հայ ազգային կոնգրեսի անդամ Տիգրան Առաքելյանը գտնվում է Ազգային անվտանգության ծառայության մեկուսարանում, նրա հետ տեսակցություններն արգելված են: Այս մասին NEWS.am-ի թղթակցի հետ զրույցում ասաց նրա եղբայրը՝ Հունան Առաքելյանը:
Նա նշեց, որ Տիգրան Առաքելյանը իրեն մեղավոր չի ճանաչում եւ ցուցմունք չի տվել: Իսկ թե ինչ գործողություններ են նախաձեռնել, բողոքարկումներ, միջնորդություններ, եղբայրը տեղեկություն չուներ: Հունան Առաքելյանն ասաց, որ առայժմ նպատակահարմար չեն գտնում հրապարակել փաստաբանի անունը:
Իսկ թե ինչ շորթման մասին է խոսքը, Տիգրան Առաքելյանի եղբայրն ասաց, որ պատկերացում չունեն: Ինչ վերաբերում է ՀՀԿ-ական պատգամավորների ինտիմ տեսանյութեր հրապարակելուն, նա նշեց, որ գործում նման բան չկա:
Ավելի վաղ NEWS.am-ը հայտնել էր, որ Տիգրան Առաքելյանը ձերբակալվել, ապա կալանավորվել է: Նրան մեղադրանք է առաջադրել ԱԱԾ-ն: Լրատվամիջոցներում տեղեկություններ էին տարածվել, թե նրան ձերբակալել են Հայաստանի Հանրապետական կուսակցության երկու պատգամավորների վերաբերյալ ինտիմ բնույթի տեսանյութեր տնօրինելու եւ հրապարակելու համար: