Երևանի Օղակաձև այգում այսօր` օգոստոսի 3-ին, Հայաստանի եզդի համայնքի ներկայացուցիչները նշեցին Իրաքում «Իսլամական պետության» կողմից իրականացվող եզդիների ցեղասպանության մեկ տարին։ Եզդի համայնքի ներկայացուցիչները ծաղիկներ դրեցին 20-րդ դարի սկզբին Օսմանյան Թուրքիայում եւ վերջին մեկ տարում` Իրաքի Շանգալ շրջանում եզդիների նկատմամբ իրականացված սպանդի զոհերի հիշատակը հավերժացնող հուշարձանին` 1 րոպե լռությամբ հարգելով անմեղ զոհերի հիշատակը:
«Մեդիա-Շանգալ» եզդիների միավորում ՀԿ նախագահ Ամո Շարոյանը լրագրողների հետ զրույցում նշեց, որ եզդի ժողովուրդը չնայած հաճախ է ենթարկվել ճնշումների, սակայն միշտ պայքարել է` ազգի պահպանման համար:
«Այսօր իսլամիստները Իրաքում ոչնչացնում են եզդի ժողովրդին, սակայն, բարեբախտաբար, մենք արդեն ունենք եզդիական ջոկատներ, որոնք պայքարում են նրանց դեմ և նրանց հաջողվել է ազատագրել Շանգալի որոշ տարածքներ: Մեր կանաց և երեխաներին նրանք գերության են վերցրել և վաճառում ու սպանում են նրանց: Մենք պայքարելու ենք, որպեսզի եզդի ժողովրդի նկատամբ իրականացվող այս ոճրագործությանը վերջ տրվի, և երբեք չենք մոռանալու անմեղ զոհերի հիշատակը»,-ասաց նա:
Նշենք, որ «Իսլամական պետությունը» Իրաքի հյուսիսում գտնվող Քրդական ինքնավարության Շանգալ շրջանում ապրող եզդի ժողովրդի նկատմամբ 2014 թվականի օգոստոսի 3-ից ցեղասպանություն է իրականացնում:
2014թ. օգոստոսի 3-ը համարվում է Սինջարիի կոտորածների սկիզբը: Այդ օրվանից «Իսլամական պետությունը» սկսեց Իրաքի Քրդական ինքնավարության Սինջարի շրջանում և հարակից քաղաքներում եզդիների սպանդը, ինչի հետևանքով սպանվեց մի քանի հազար եզդի: Օգոստոսի 8-ին ԱՄՆ-ն օդային հարվածներ հասցրեց ԻՊ դիրքերին, ինչը հանգեցրեց ԻՊ-ի դեմ մի քանի երկրների պատերազմի: Քրդերի և ամերիկյան ուժերի օգնությամբ մոտ 50 հազար եզդի կարողացավ տարհանվել և տեղափոխվել Սինջարի լեռներ:
