Սահմանադրության նախագծում որեւէ բան վերջնական չէ, այդ թվում՝ երկփուլ ընտրությունների դրույթը կարող է վերանայվել: Այս մասին NEWS.am-ի թղթակցի հետ զրույցում ասաց ԱԺ ՀՀԿ-ական պատգամավոր Մկրտիչ Մինասյանը:
«Խնդիրը մեկն է՝ պերմանենտ ընտրությունների դաշտ չմտնելը, այս դեպքում առաջարկվել է այդ տարբերակը, բայց կարող է լինել այլ տարբերակ, օրինակ՝ Երեւանի ավագանու ընտրություններն են՝ բոնուսային համակարգի կիրառումը: Քանի որ Վենետիկի հանձնաժողովն էլ ասել է, որ կարելի է վերանայել, կարող ենք վերանայել, խնդիրը լուծման կարիք ունի»,-ասաց պատգամավորը:
Նոր սահմանադրությամբ առաջարկվող երկփուլ ընտրությունների դրույթի համաձայն՝ եթե որեւէ ուժ չի հավաքում 50 տոկոսից ավելի ձայն, 1-ին եւ 2-րդ տեղերը զբաղեցրած քաղաքական ուժերի միջեւ նոր ընտրություն է տեղի ունենում, որպեսզի որեւէ ուժ արհեստականորեն ԱԺ-ում ունենա 50 տոկոսից ավելի մանդատ: Մկրտիչ Մինասյանը չի կարծում, թե այսպես արհեստականորեն մեծացնում է շատ ձայներ ստացած ուժի դերը: Նա նշեց, որ կարող են երկրորդ եւ երրորդ տեղերը զբաղեցրած ուժերը միավորվել եւ նրանց ձայների քանակը կգերազանցի առաջին տեղը զբաղեցրած ուժի ձայների թիվը:
«Սա դոգմա չէ, եթե կա առողջ քննադատություն, առաջարկ, պատրաստ ենք լսել, նպատակը մեկն է՝ առավել արդյունավետ գործող կառավարման համակարգ ունենալ, եթե կա մտավախություն, պետք է բարձրաձայնել, սահմանադրական իրավունքի մանսագետներն ու փորձագետները կփորձեն պատախանել, մեկնաբանել»,-ասաց պատգամավորը:
Ինչ վերաբերում է ԱԺ-ում նոր խմբակցություններ չձեւավորելուն, ՀՀԿ-ական պատգամավորն ասաց, որ դրա նպատակը առնետավազքը կանխելն է, այսինքն՝ երբ տվյալ կուսակցությունից պատգամավոր դարձած անձը քաղաքական իրավիճակի պայմաններում մի կուսակացությունից մյուսը չգնա,առնետավազք չլինի:
Անդրադառնալով նախագահին ընտրող ընտրիչներին՝ պատգամավորն ասաց, որ այս հարցը կկարգավորվի օրենքով, կձեւավորվի ընդհանուր մոտեցում: Նա նշեց, որ ընտրիչները կլինեն այնքան, ինչքան պատգամավոր կա Աժ-ում, որպեսզի մարդկանց, համայնքների, ազգաբնակչության շարքերը ներդաշնակորեն հաշվի առնեն:
Վարչապետին անվստահություն հայտնելիս անվանական քվեարկությունը չի կարող խոչընդոտ լինել պատգամավորի համար: Մկրտիչ Մինասյանը շեշտեց, որ կուսակցությունների կողմից ներկայացված անձինք քաղաքական գործիչներ են, ու եթե նրանք պետք է փախչեն պատասխանատվությունից, ապա չեն կարող կոչվել քաղաքական գործիչ:
Վարչապետի թեկնածուին ներկայացնելն էլ, նրա համոզմամբ, ունի ոչ միայն քարոզչական, այլեւ իրավական շերտ: «Առաջին հերթին դա քաղաքական է բայց իրավական շեշտադրում եւս կա, եթե կուսակցությունը հայտարարում է, որ իր վարչապետի թեկնածուն է, բացի քաղաքական վճռից, կա նաեւ իրավական շերտ, մարդիկ պետք է իմանան, որ այդ կուսակցությանը ձայն տալուց ձայն են տալու նաեւ վարչապետին, քաղաքական լուծումը իրավական շերտ ունի»,-ասաց պատգամավորը: