Երեւանի Հանրապետության հրապարակում «Ոտքի Հայաստան» շարժման 8-րդ գիշերը խաղաղ է անցել: Այս մասին այսօր` օգոստոսի 4-ին, NEWS.am-ի հետ զրույցում ասաց նախաձեռնության անդամ Շավարշ Մարգարյանը:
«Գիշերել ենք մոտավորապես 10 հոգով, ամեն ինչ լավ է անցել: Ոստիկաններ կային, որոնք մոտենում էին մեզ, որ նայեին, թե ինչ ենք անում, անցորդներ էլ էին մոտենում մեզ»,-ասաց նա:
«Ոտքի Հայաստան» շարժման խորհրդի անդամ Դավիթ Սանասարյանն էլ մեզ հետ զրույցում նշեց, որ այսօր Հանրապետության հրապարակում նախաձեռնությունը նոր հայտարարությամբ է հանդես գալու:
«Ոտքի Հայաստան» շարժումը հայտարարել է, որ հուլիսի 27-ից 72-ժամյա նստացույց է սկսում։ Սակայն ոստիկանությունը նրանց թույլ չի տալիս մոտենալ հրապարակի կենտրոնի գորգին։ Ակտիվիստները գիշերել են Հանրապետության հրապարակում։ Գիշերը խաղաղ է անցել, առավոտից վերսկսվել են ակտիվիստների անհնազանդության ակցիաները։
Միաժամանակ, Վանաձորից մեկնարկել է շարժման անդամների մարզային երթը, որի մասնակիցներն իրազեկման ակցիաներ կանցկացնեն Գյումրիում, Թալինում, Աշտարակում, ապա կգան մայրաքաղաք։
Հիշեցնենք, որ «Ոտքի Հայաստան» նախաձեռնությունը հայտարարել էր, որ եթե ՀԾԿՀ-ն չեղյալ չհայտարարի էլեկտրաէներգիայի սակագնի բարձրացման մասին որոշումը, հուլիսի 27-ից բողոքի ակցիաներ են սկսելու: Նախաձեռնության անդամներն այցելելու են մարզեր, ինչպես նաեւ փողոցներ են փակելու։
